سری لنکا میں بندر گرڈ سٹیشن میں گھس گیا، پورے ملک میں بجلی بند

سری لنکا میں ایک بندر گرڈ سٹیشن میں گھس گیا جس کی وجہ سے پورے ملک کو لوڈشیڈنگ کا سامنا کرنا پڑ گیا۔

فرانسیسی نیوز ایجنسی اے ایف پی کے مطابق حکام نے کہا ہے کہ یہ واقعہ اتوار کی صبح 11 بجے پیش آیا اور تین گھنٹے بعد بھی بجلی پوری طرح بحال نہ ہو سکی۔

وزیر توانائی کمارا جایا کوڈے نے کہا کہ ’ایک بندر ہمارے گرڈ سٹیشن کے ٹرانسفارمر سے ٹکرایا جس کی وجہ بجلی کا نظام متاثر ہوا۔‘

ان کے مطابق یہ واقعہ جنوبی کولمبو کے مضافات میں پیش آیا۔

اگرچہ کچھ علاقوں میں بجلی بحال کر دی گئی ہے، لیکن ابھی یہ واضح نہیں ہے کہ لوڈشیڈنگ کب تک رہے گی۔

وزیر کا کہنا تھا کہ ’انجینیئرز بجلی کے نظام کو جلد سے جلد بحال کرنے کے لیے کام کر رہے ہیں۔‘

2022 میں معاشی بحران کے دوران سری لنکا کو موسم گرما میں کئی ماہ تک لوڈ شیڈنگ کا سامنا کرنا پڑا تھا۔ پیٹرول پمپس پر ڈیزل اور پیٹرول کی کمی تھی اور دن بھر میں بجلی صرف 13 گھنٹوں کے لیے مہیا کی جا رہی تھی۔