چیمپیئنز ٹرافی 2025 کی افتتاحی تقریب: ’اب آپ کی باری ہے کہ سٹیڈیمز کو بھر دیں‘
اتوار 16 فروری 2025 12:26
نیوزی لینڈ، جنوبی افریقہ، افغانستان اور انگلینڈ کی ٹیمیں پہلے ہی پاکستان پہنچ چکی ہیں (فوٹو: پی سی بی)
چیئرمین پاکستان کرکٹ بورڈ (پی سی بی) محسن نقوی نے کہا ہے کہ پاکستان چیمپیئنز ٹرافی کے لیے تیار ہے۔
اتوار کو لاہور میں آئی سی سی چیمپیئنز ٹرافی 2025 کی افتتاحی تقریب سے خطاب میں محسن نقوی نے کہا کہ ’میں پاکستان کرکٹ بورڈ کی جانب سے یہاں موجود تمام افراد، 2017 کی چیمپیئنز ٹرافی کی فاتح ٹیم اور رنر اپ ٹیم کو شاہی قلعے کے اندر دیوان عام میں خوش آمدید کہتا ہوں۔‘
انہوں نے کہا کہ یہ دنیا دیکھ رہی ہے آپ لوگ دیکھ رہے ہیں اور میں ہر کرکٹ فین اور سپورٹر کو یقین دہانی کراتا ہوں کہ پاکستان چیمپیئنز ٹرافی کے لیے تیار ہے۔
’اس وقت جب میں بات کر رہا ہوں چار ٹیمیں کراچی پہنچ چکی ہیں جبکہ انگلینڈ اور آسٹریلیا کی ٹیمیں اگلے 48 گھنٹوں میں لاہور پہنچ جائیں گی۔‘
چیئرمین پی سی بی کا کہنا تھا کہ ’29 برسوں میں پہلی بار پاکستان میں آئی سی سی چیمپیئنز ٹرافی کا انعقاد ہو رہا ہے۔ یہ ٹورنامنٹ کرکٹ سے بڑھ کر ہے، یہ پاکستان کی میزبانی اور جنون کو ظاہر کرنے کا ایک موقع ہے۔‘
’تقریباً تین دہائیوں تک پاکستان میں کرکٹ سے محبت کرنے والوں کی دو نسلیں اپنے ملک میں آئی سی سی کا کوئی عالمی ایونٹ دیکھنے سے محروم رہی ہیں۔ لیکن اب سب بدل گیا ہے اور اب آپ کی باری ہے کہ سٹیڈیمز کو بھر دیں۔‘
چیمپیئنز ٹرافی کی افتتاحی تقریب میں انٹرنیشنل کرکٹ کونسل (آئی سی سی)، پاکستان کرکٹ بورڈ (پی سی بی) کی اہم شخصیات، غیرملکی مندوبین، سابق کرکٹرز اور پاکستانی سیاسی رہنما بھی شریک تھے۔
شائقین کرکٹ شدت سے چیمپیئنز ٹرافی کے منتظر ہیں جس میں آٹھ ٹیمیں مدمقابل ہوں گی۔ انڈیا کے علاوہ دیگر ٹیمیں پاکستان میں میچز کھیلیں گی۔
دفاعی چیمپیئن پاکستان اس چیمپینئز ٹرافی کے 2025 ایڈیشن کی میزبانی کر رہا ہے۔
میگا ایونٹ کا پہلا میچ 19 فروری کو کراچی میں پاکستان اور نیوزی لینڈ کے درمیان ہو گا۔
گو کہ اس ٹورنامنٹ کی میزبانی پاکستان کے پاس ہے لیکن چار میچز اور پہلے سیمی فائنل کے لیے پاکستان اور متحدہ عرب امارات شریک میزبان ہوں گے۔
انڈیا کی جانب سے سیاست اور سکیورٹی سے جڑے تحفظات کی وجہ سے پاکستان نہ آنے کے فیصلے کے بعد ٹورنامنٹ کے چند میچز کی میزبانی میں متحدہ عرب امارات کو شریک کیا گیا۔
انڈین ٹیم اپنے گروپ میچز پاکستان، بنگلہ دیش اور نیوزی لینڈ کے خلاف دبئی کرکٹ سٹیڈیم میں کھیلے گی جبکہ پہلا سیمی فائنل بھی اسی گراؤنڈ میں ہو گا۔
انڈیا کے فائنل میں پہنچنے کی صورت میں ایونٹ کا فیصلہ کن میچ بھی دبئی ہی میں کھیلا جائے گا۔
انڈین کپتان روہت شرما کی عدم موجودگی کے باعث چیمپینئنز ٹرافی کی افتتاحی تقریب میں ٹیم کپتانوں کی اکٹھے روایتی تصویر نہیں کھینچی جا سکے گی۔
نیوزی لینڈ، جنوبی افریقہ، افغانستان اور انگلینڈ کی ٹیمیں پہلے ہی پاکستان پہنچ چکی ہیں۔
پاکستان میں صرف دو وارم اپ میچز شیڈول ہیں جبکہ پاکستان اور بنگلہ دیش کے درمیان تیسرا اور آخری وارم اپ میچ یو اے ای میں کھیلا جائے گا۔
واضح رہے کہ سنہ 2017 میں سرفراز احمد کی قیادت میں انڈیا کو 180 رنز سے شکست دے کر پاکستان نے چیمپینئنز ٹرافی اپنے نام کی تھی۔
