داخلی عازمین کے لیے چار حج پیکیج، قیمتیں اور سہولتیں کیا ہیں؟

سعودی وزارت حج وعمرہ نے داخلی عازمین حج کے لیے ’نسک پورٹل‘ پر چار پیکیجز متعارف کرائے ہیں۔

داخلی عازمین نسک پورٹل کے ذریعے اپنے لیے مطلوبہ پیکج حاصل کرسکتے ہیں۔ پیکیجز میں ٹرانسپورٹ پروگرام شامل نہیں ہوگا۔

عکاظ کے مطابق وزارت حج وعمرہ نے نسک پورٹل پر رواں برس اندرون مملکت سے عازمین کے لیے جن 4 پیکجز کا اعلان کیا ہے ان میں وادی منی کی خیمہ بستی میں رہائش کا پیکیج 10 ہزار 366 ریال سے شروع ہوتا ہے۔

دوسرا پیکیج اکنامک خیموں کا ہے جس کی قیمت 8092 ریال سے شروع ہے جبکہ تیسرا جمرات ٹاورز کا ہے جس کی قیمت 13150 ریال اور چوتھے پیکیج کی قیمت 12537 ریال ہے یہ کدانہ ٹاورز کا ہے اس میں کیٹرنگ کا آپشن  موجود ہے تاہم تمام پیکیجز میں ٹرانسپورٹ پروگرام شامل نہیں۔

یاد رہے کہ سعودی وزارت حج وعمرہ نے 8 فروری سے داخلی عازمین کے لیے نسک پلیٹ فارم پر حج پیکیج کی بکنگ کا اعلان کیا تھا۔

وزارتِ حج وعمرہ کے مطابق سعودی شہری اور مملکت میں مقیم غیرملکی جو اس سال حج کرنے کے خواہش مند ہیں وہ مختلف نوعیت کے پیکیجز حاصل کرنے کے لیے ’نسک‘ ڈیجیٹل پلیٹ فارم پر بکنگ کر سکتے ہیں۔

 درخواست گزار پلیٹ فارم پر درست معلومات اپ لوڈ کریں۔ وہ خواتین جو محرم سے استثنیٰ حاصل کرنا چاہتی ہیں انہیں بھی اس کی وضاحت بیان کرنا ہوگی تاکہ انہیں بغیرمحرم کے پرمٹ جاری کیا جا سکے۔

واضح رہے داخلی عازمین کے لیے حج پیکیجز پہلے آئیے پہلے پائیےکی بنیاد پر بک کیے جاتے ہیں۔