فخر زمان چیمپئنز ٹرافی 2025 سے باہر، امام الحق ٹیم میں شامل

پاکستان کرکٹ ٹیم کے اوپنر فخر زمان آئی سی سی چیمپئنز ٹرافی 2025 سے باہر ہو گئے ہیں جبکہ ان کی جگہ امام الحق پاکستان ٹیم کا حصہ ہوں گے۔

جمعرات کو سوشل میڈیا ویب سائٹ ایکس پر پوسٹ کرتے ہوئے فخر زمان کا کہنا تھا کہ ’اس سٹیج پر پاکستان کی نمائندگی کرنا ہر کرکٹر کا اعزاز اور خواب ہوتا ہے۔ مجھے خوش قسمتی سے پاکستان کی نمائندگی کرنے کا متعدد بار موقع ملا ہے اور ہمیشہ فخر محسوس ہوا۔‘

ان کا مزید کہنا تھا کہ ’بدقسمتی سے میں اب 2025 کی آئی سی سی چیمپئنز ٹرافی سے باہر ہوں لیکن یقیناً اللہ بہترین منصوبہ ساز ہے۔‘

کرکٹ فینز کا شکریہ ادا کرتے ہوئے انہوں نے کہا کہ ’اس موقع پر سب کا شکر گزار ہوں، میں اپنے گرین شرٹس کی گھر سے حمایت کروں گا۔‘

آئی سی سی کے مطابق فخر زمان کی جگہ امام الحق اب پاکستان ٹیم کا حصہ ہوں گے۔

اس سے قبل پاکستان کرکٹ بورڈ (پی سی بی) کی جانب سے جاری بیان میں کہا گیا تھا کہ فخر زمان انڈیا کے خلاف میچ کے لیے دبئی روانہ نہیں ہوں گے۔

یاد رہے کہ فخر زمان نیوزی لینڈ کے خلاف افتتاحی میچ میں انجری کا شکار ہو گئے تھے۔ 

فخر کو گھٹنے میں تکلیف کے باعث میدان سے باہر جانا پڑا اور ابتدائی علاج کے بعد وہ دوبارہ میدان میں آگئے تھے۔

پاکستان کی اننگز کے آغاز میں فخر اوپننگ کے لیے بھی نہ آئے اور انہیں چوتھے نمبر پر بھیجا گیا، جس کے بعد بھی وہ دوران بیٹنگ تکلیف میں نظر آئے۔