چیمپئنز ٹرافی: دفاعی چیمپئن پاکستان پہلے میچ میں ڈھیر، نیوزی لینڈ فاتح

آئی سی سی چیمپئنز ٹرافی 2025 کے افتتاحی میچ میں نیوزی لینڈ نے پاکستان کو 60 رنز سے شکست دے دی۔

نیشنل سٹیڈیم کراچی میں بدھ کو 321 رنز کے تعاقب میں پاکستان کی پوری ٹیم 48 ویں اوور میں 260 رنز بنا کر ڈھیر ہو گئی۔

ہدف کے تعاقب میں پاکستان کی کارکردگی انتہائی مایوس کُن رہی، بیٹنگ آرڈر ابتدائی اوورز سے ہی زوال کا شکار ہو گیا۔

پاکستان کی جانب سے بابر اعظم 64، خوشدل شاہ نے 69، فخر زمان نے 24 اور سلمان علی آغا نے 42 رنز بنائے، ان کے علاوہ کوئی بھی کھلاڑی نمایاں کارکردگی نہ دکھا سکا۔

کیویز کے 118 رنز بنا کر ناٹ آؤٹ رہنے والے کھلاڑی ٹام لیتھم مین آف دی میچ رہے۔

اس سے قبل نیوزی لینڈ نے مقررہ 50 اوورز میں پانچ وکٹوں کے نقصان 320 رنز بنائے تھے۔

نیوزی لینڈ کی جانب سے ٹام لیتھم 118، ویل ینگ 107 اور گلین فلپس 61 رنز کے ساتھ نمایاں رہے۔

نیوزی لینڈ کے بیٹرز کے سامنے پاکستانی بولرز بے بس دکھائی دیے، آخری آٹھ اوورز میں نیوزی لینڈ نے 105 رنز بنائے۔

میچ کے ابتدائی اوور میں پاکستان ٹیم کے اوپننگ بیٹر فخر زمان فیلڈنگ کے دوران بظاہر معمولی زخمی ہو کر گراؤنڈ سے باہر چلے گئے تھے، تاہم بعد میں وہ کھیل کا حصہ بن گئے تھے۔

پاکستان کی اننگز

پاکستان نے 321 رنز کے تعاقب کا مایوس کُن آغاز کیا۔ پاکستان کی پہلی وکٹ اوپنر سعود شکیل کی صورت میں چوتھے اوور کی چوتھی گیند پر اس وقت گری جب ٹیم کے مجموعی سکور صرف آٹھ رنز تھے، وہ چھ رنز بنا کرآؤٹ ہوئے۔

ون ڈاؤن آنے والے کپتان محمد رضوان بھی کوئی خاص کارکردگی دکھانے میں ناکام رہے، وہ 14 گیندوں پر صرف تین رنز بنا کر آؤٹ ہوئے۔

فخر زمان کریز پر اترے اور ٹیم کے سکور بڑھانے کی کوشش کی، انہوں نے مسلسل شارٹس کھیلی لیکن قسمت نے ان کا ساتھ نہ دیا۔ دو مرتبہ کیچ ڈراپ ہونے کے بعد بل آخر وہ کلین بولڈ ہوئے۔

فخر زمان نے چار چوکوں کی مدد سے 24 رنز بنائے۔ اس کے بعد سلمان علی آغا 42 اور طیب طاہر ایک رن بنا کر آؤٹ ہو گئے۔

اننگز کی اوپننگ کرنے والے بابر اعظم طویل دیر تک وکٹ پر موجود رہے۔ سست بیٹنگ کا مظاہرہ کرتے ہوئے وہ 90 گیندوں پر 64 رنز بنا کر آؤٹ ہوئے۔

اس کے بعد شاہین شاہ آفریدی 14، خوشدل شاہ 69، حارث رؤف 19، نسیم شاہ 13 رنز بنا کر آؤٹ ہوئے جبکہ ابرار احمد صفر پر ناٹ آؤٹ رہے۔

نیوزی لینڈ کی جانب سے وِل او رُورک اور مچل سینٹنر نے تین تین، مائیکل بریسویل اور نیتھن سمتھ نے ایک، ایک جبکہ میٹ ہینری نے دو وکٹیں حاصل کی۔

نیوزی لینڈ کی اننگز

نیوزی لینڈ نے پاکستان کی دعوت پر بیٹنگ کا آغاز کیا تو وِل ینگ اور ڈیوون کونوے کریز پر اترے۔ پہلے آٹھ اوورز تک دونوں بیٹرز نے بغیر کسی نقصان کے 39 رنز بنائے۔

ٹیم نیوزی لینڈ کو پہلا نقصان اس وقت ہوا جب آٹھویں اوور کی تیسری گیند پر ڈیوون کونوے 10 رنز بنا کر ابرار احمد کا شکار بنے۔

ون ڈاؤن آنے والے کین ولیمسن بھی کوئی خاص کارکردگی دکھانے میں ناکام رہے۔ وہ صرف ایک رن بنا کر نسیم شاہ کی گیند پر وکٹ کیپر محمد رضوان کو کیچ تھما بیٹھے۔

نیوزی لینڈ کی تیسری وکٹ 17ویں اوور کی دوسری گیند پر ڈیرل مچل کی صورت میں اس وقت گری جب ٹیم کے مجموعی سکور 73 تھے۔

ایونٹ کی پہلی سینچری سکور کرنے والے اوپننگ بیٹر وِل ینگ 113 گیندوں پر ایک چھکے اور 11 چوکوں کی مدد سے 107 رنز بنا کر آؤٹ ہوئے۔

میچ کے آخری اوورز میں نیوزی لینڈ کے بیٹرز نے پاکستانی بولرز کو آڑے ہاتھوں لیا، آخری آٹھ اوورز میں نیوزی لینڈ نے 105 رنز بنائے۔

گلین فلپس نے عمدہ کارکردگی کا مظاہرہ کرتے ہوئے چار چھکوں اور تین چوکوں کی مدد سے 61 رنز کی اننگز کھیلی، وہ حارث رؤف کی گیند پر فخر زمان کو کیچ تھما کر آؤٹ ہوئے۔

نیوزی لینڈ کی جانب سے ٹام لیتھم تین چھکوں اور 10 چوکوں کی مدد سے 118 رنز بنا کر آؤٹ ہوئے جبکہ مائیکل بریسویل بغیر کوئی رنز بنائے پویلین لوٹے۔

پاکستان کی جانب سے نسیم شاہ اور حاررث رؤف نے دو، دو جبکہ ابرار احمد نے ایک وکٹ حاصل کی۔

دونوں ٹیمیں اب تک چیمپئنز ٹرافی ایونٹ میں چارمرتبہ آمنے سامنے آ چکی ہیں جس میں چاروں مرتبہ کیویز کو جیت حاصل ہوئی۔

پاکستان کی قیادت محمد رضوان جبکہ نیوزی لینڈ کی کپتانی مچل سینٹنر کر رہے تھے۔

پاکستان کی پلیئنگ الیون

اس میچ کے لیے پاکستان کی ٹیم میں فخر زمان، بابر اعظم، سعود شکیل، محمد رضوان (وکٹ کیپر، کپتان)، سلمان آغا، طیب طاہر، خوشدل شاہ، شاہین شاہ آفریدی، نسیم شاہ، حارث رؤف اور ابرار احمد شامل تھے۔

نیوزی لینڈ کی پلیئنگ الیون

اس میچ کے لیے نیوزی لینڈ کی ٹیم میں وِل ینگ، ڈیوون کونوے، کین ولیمسن، ڈیرل مچل، ٹام لیتھم (وکٹ کیپر)، گلین فلپس، مائیکل بریسویل، مچل سینٹنر (کپتان)، نیتھن سمتھ، میٹ ہینری اور وِل او رُورک شامل تھے۔