سعودی عرب میں مہندی کے ذریعے بچیوں کو روزہ رکھنے کی ترغیب ،ایک خوبصورت روایت

سعودی عرب کے شمالی حدود ریجن میں رمضان کی آمد کے ساتھ خواتین مہندی کے ذریعے چھوٹی بچیوں کو روزے رکھنے کی ترغیب دے رہی ہیں۔ ریجن میں رمضان کے استقبال کی یہ روایت چلی آرہی ہے۔

سعودی خبررساں ادارے ’ایس پی اے‘ کے مطابق کئی خاندان رمضان کی ابتدائی راتوں میں بچیوں کے ہاتھوں پر مہندی لگانے کا اہتمام کرتے ہیں۔  بچیاں اپنے ہاتھوں کو مہندی کے خوبصورت نقش و نگار سے مزین کرنے پر پرجوش اور خوش ہوتی ہیں۔ 

عرعر شہر کی ایک خاتون وجدان العنزی کا کہنا ہے گزشتہ کئی برسوں سے اپنی بچیوں کے ہاتھوں پر رمضان کے آغاز پر مہندی لگا رہے ہیں، یہ ایک خوبصورت روایت ہے جو بچیوں کو  یہ احساس دلاتی ہے کہ وہ بڑوں کےساتھ رمضان کے ماحول کا حصہ ہیں۔
ایک اور خاتون عفاف الثوینی نے کہا کہ اس روایت کا اثر صرف جمالیاتی پہلو تک محدود نہیں بلکہ یہ بچیوں کے دلوں میں مذہبی اور سماجی اقدار کو فروغ دیتی ہے۔ 

یہ مثبت طریقے بچوں کو بغیر کسی دباؤ کے روزہ رکھنے میں مدد دیتے ہیں جس سے وہ اس ماہ مبارک میں روزہ رکھنے کے لیے پہلے سے تیار ہوجاتے ہیں۔

یہ خوبصورت روایت سعودی عرب کے شمالی حدود ریجن کے افراد کی ثقافتی اور سماجی  شناخت کا حصہ ہے۔

 ہاتھوں پر لگی مہندی کی وجہ سے بچیوں کو یاد رہتا ہے کہ ان کا روزہ ہے اور وہ اپنے ہاتھ کھانے پینے کی اشیا کی طرف نہیں بڑھا سکتیں۔