دونوں ملکوں کے درمیان تعلقات بڑھانے کے طریقوں، لبنان اور خطے کی صورتحال اور اس حوالے سے کی جانے والی کوششوں پر تبادلہ خیال کیا گیا۔
جوزف عون گزشتہ چھ برس کے دوران مملکت کا دورہ کرنے والے پہلے لبنانی صدر ہیں۔ دو ماہ قبل عہدہ سنبھالنے کے بعد اپنے پہلے سرکاری دورے پر مملکت پہنچے ہیں۔
ریاض پہنچنے پر ریاض کے نائب گورنر شہزادہ محمد بن عبدالرحمن بن عبدالعزیز اور دیگر عہدیداروں نے استقبال کیا۔
سعودی عرب پہنچنے کے بعد جوزف عون کا کہنا تھا وہ سعودی ولی عہد شہزادہ محمد بن سلمان کے ساتھ ملاقات کے حوالے سے پرجوش ہیں۔
انہوں نے اس امید کا اظہار کیا کہ ان کے دورۂ سعودی عرب سے دونوں ممالک کے درمیان تعلقات مضبوط ہوں گے۔
صدر عون نے لبنان کی مدد اور استحکام میں سعودی عرب کے کردار کی تعریف کی۔
لبنانی صدر کے لیے باضابطہ استقبالہ تقریب کا اہتمام کیا گیا (فوٹو: ایس پی اے)
قبل ازیں لبنان کے صدارتی دفتر کی جانب سے ایکس پر جاری بیان میں کہا گہا تھا کہ صدر جوزف عون رفیق حریری انٹرنیشنل ایئرپورٹ سے سعودی عرب کے لیے روانہ ہوگئے۔
بیان میں مزید کہا گیا تھا کہ دورے میں صدر عون کے ساتھ لبنان کے وزیرخارجہ اور سعودی عرب میں لبنان کے سفیر ہیں۔
جمعے کو سعودی اخبار ’الشرق الأوسط‘ کے ساتھ انٹرویو میں صدر عون کا کہنا تھا ’مجھے امید ہے کہ سعودی عرب دوطرفہ تعلقات کو دوبارہ استوار کرنے اور حالیہ رکاوٹوں پر قابو پانے میں ہماری مدد کرے گا۔‘
صدر جوزف کا کہنا تھا انہوں نے اپنے بیرونی دورے کے لیے سعودی عرب کا انتخاب لبنان اور سعودی عرب کے درمیان تاریخی تعلق اور سعودی عرب کے علاقائی اور عالمی پلیئر کے طور پر کردار کے تناظر میں کیا۔
انہوں نے امید ظاہر کی کہ لبنان اور سعودی عرب معمول کے معاشی تعلقات قائم کریں گے۔ ان کا کہنا تھا کہ لبنان اپنے آپ کو سعودی وژن 2030 کے ساتھ وابستہ کر سکتا ہے۔
’اس سے سعودی اپنے دوسرے گھر لبنان آ سکیں گے۔‘
جوزف عون، جنہوں نے رواں سال جنوری میں صدر کا عہدہ سنبھالا تھا، نے ملک میں ایک نئے دور کے آغاز کرنے کا عزم کیا ہے جس میں ’ہتھیاروں پر غلبہ‘ صرف ریاست کا ہو گا۔
