آخری عشرے کے لیے یومیہ تعداد 130 تک کر دی گئی ہے۔ (فوٹو ایس پی اے)
سعودی ریلوے نے رمضان المبارک کے آخری عشرے میں حرمین ٹرین سروس میں اضافہ کرتے ہوئے مدینہ منورہ سے مکہ آمد ورفت کے لیے یومیہ تعداد 130 تک کر دی ہے۔
سعودی خبررساں ایجنسی ’ایس پی اے‘ کے مطابق سعودی ریلوے ’سار‘ کی جانب سے ماہ رمضان المبارک میں زائرین کی سہولت کے لیے مکہ اور مدینہ منورہ کے مابین چلنے والی ہائی اسپیڈ ٹرین سروس میں اضافہ کیا ہے تاکہ زیادہ سے زیادہ تعداد میں زائرین کو تیز رفتار نقل و حمل کی سہولت فراہم کی جاسکے۔
گیٹس کے تعداد 8 سے بڑھا کر 24 کر دی گئی ہے۔ (فوٹو ایس پی اے)
سعودی ریلوے (سار) نے رمضان آپریشن کے حوالے سے بتایا کہ رمضان المبارک کے آخری عشرے میں بڑی تعداد میں زائرین مکہ مکرمہ اور مدینہ منورہ آتے ہیں جس کے لیے بوگیوں اور ٹرینوں کی تعداد میں بھی اضافہ کیا گیا ہے ۔ منصوبے کے مطابق رمضان المبارک کے دوران 1.6 ملین زائرین 3400 ٹرینوں کے ذریعے نقل وحمل کی سہولت فراہم کی جائے گی۔
دوسری جانب مدینہ منورہ اسٹیشن پر زائرین کو بہتر سہولیات کی فراہمی کو یقینی بنانے کےلیے ’سار‘ انتظامیہ نے مسافروں کے لیے اسٹیشن کے دو مزید لاونچ کھول دیئے ہیں جبکہ گیٹس کے تعداد بھی 8 سے بڑھا کر 24 کر دی گئی ہے۔
حرمین ٹرین کا شمار دنیا کی 10 تیز رفتار ٹرینوں میں ہوتا ہے۔ (فوٹو ایس پی اے)
واضح رہے حرمین ہائی اسپیڈ ٹرین کا شمار دنیا کی 10 تیز رفتار ٹرینوں میں ہوتا ہے جبکہ مشرق وسطی کا یہ سب سے بڑا ریلوے منصوبہ ہے۔
مکہ مکرمہ سے مدینہ منورہ کی مسافت دو گھنٹے کے اندر ٹرین کے ذریعے طے کی جاتی ہے۔ ایک ٹرین میں 13 بوگیاں ہیں جن میں 417 مسافروں کی گنجائش ہے۔
