ڈاکٹر ماہ رنگ اور ساتھیوں کی گرفتاری کے خلاف اختر مینگل کا لانگ مارچ کا اعلان

ڈاکٹر ماہ رنگ بلوچ سمیت بلوچ یکجہتی کمیٹی کے کارکنوں کی گرفتاری کے خلاف بلوچستان نیشنل پارٹی (مینگل) کی اپیل پر صوبے کے کئی شہروں میں شٹر ڈاؤن ہڑتال کی جا رہی ہے۔

مستونگ، قلات، خضدار، خاران، چاغی، پنجگور، نوشکی سمیت صوبے کے شہروں میں تجارتی مراکز بند اور ٹریفک معمول سے کم ہیں۔

بی این پی کی جانب سے یہ احتجاج ڈاکٹر ماہ رنگ بلوچ سمیت بلوچ یکجہتی کمیٹی کی قیادت اور کارکنوں کی گرفتاریوں، مظاہرین پر مبینہ تشدد اور مقدمات کے اندراج کے خلاف کیا جا رہا ہے۔

کئی شہروں میں مسلسل چار دنوں سے شٹر ڈاؤن ہڑتال کی جا رہی ہے، جس سے معاملات زندگی اور کاروبار متاثر اور تاجر پریشان ہیں۔

بلوچ یکجہتی کمیٹی کی سربراہ ماہ رنگ بلوچ، سمی دین، بیبو بلوچ ، بیبرگ بلوچ سمیت درجنوں افراد کو رواں ہفتے کوئٹہ، کراچی اور بلوچستان کے مختلف شہروں سے احتجاج کے دوران گرفتار کیا گیا ہے۔

کوئٹہ میں بی وائی سی کے رہنماؤں کے خلاف ایک اور مقدمہ بلوچستان یونیورسٹی کے کیمپس تھانے میں درج کر لیا گیا ہے۔

کوئٹہ پولیس کے مطابق اب تک بلوچ یکجہتی کمیٹی کے 500 سے زائد رہنماؤں اور کارکنوں کے خلاف چار مقدمات درج کیے جا چکے ہیں۔

گرفتاریوں، تشدد اور گرفتاریوں کے خلاف بلوچ یکجہتی کمیٹی کی جانب سے مسلسل احتجاج جاری ہے۔ بلوچ یکجہتی کمیٹی نے آج مستونگ، چاغی، خاران، پنجگور، خضدار، نوشکی، کیچ، خاران، اوستہ محمد، سبی، حب اور ڈھاڈر میں مظاہروں کا اعلان کیا ہے۔

بلوچستان نیشنل پارٹی، نیشنل پارٹی سمیت بلوچستان کی مختلف سیاسی جماعتوں نے بلوچ یکجہتی کمیٹی کے خلاف کریک ڈاؤن کی مذمت کی ہے۔

لانگ مارچ کی قیادت خود کروں گا، سردار اختر مینگل

بلوچستان نیشنل پارٹی نے احتجاجی تحریک چلانے کا اعلان کیا ہے جس کے اگلے مرحلے میں بدھ کو بلوچستان بھر میں احتجاجی مظاہرے اور 28 مارچ کو خضدار کے علاقے وڈھ سے کوئٹہ تک لانگ مارچ کیا جائے گا۔

بلوچستان نیشنل پارٹی کے سربراہ سردار اختر مینگل کا کہنا ہے کہ وہ اس لانگ مارچ کی قیادت خود کریں گے۔

سماجی رابطوں کی ویب سائٹ ایکس پر ایک بیان میں ان کا کہنا تھا کہ ’تمام بلوچ بھائیوں، بہنوں، نوجوانوں اور بزرگوں کو دعوت دیتا ہوں کہ اس مارچ میں ہمارے ساتھ شامل ہوں۔‘

سردار اختر مینگل کا کہنا تھا کہ ’لانگ مارچ ہماری بیٹیوں کی گرفتاری اور ہماری ماؤں بہنوں کی بے حرمتی کے خلاف ہے۔‘

ان کا کہنا تھا کہ ’یہ صرف ہماری بیٹیوں کی گرفتاری کا معاملہ نہیں، یہ ہمارے قومی وقار، ہماری غیرت اور ہمارے وجود کا سوال ہے۔ جب تک ہماری مائیں، بہنیں اور بیٹیاں محفوظ نہیں ہم بھی خاموش نہیں رہیں گے۔‘

سردار اختر مینگل کا کہنا تھا کہ ’ہماری یہ تحریک پرامن ہے، ہم ظلم، جبر اور نا انصافی کے خلاف نکلے ہیں اور جب تک انصاف نہیں ملتا، ہم رکیں گے نہیں۔‘

ان کا کہنا تھا کہ ’ہمارا یہ مارچ صرف قدموں کا نہیں، ضمیر کا سفر ہے۔ جو خاموش ہے وہ بھی قصور وار ہے۔‘