عسیر میں سیلاب کا خطرہ، ڈیموں کے دروازے کھول دیئے گئے

عسیر کے میئر عبد اللہ الجالی نے شمالی نشیبی علاقوں کے رہائشیوں کو سیلاب کے خطرے سے آگاہ کیا ہے۔

انہوں نے کہا ہے کہ ’موسلادھار بارش کے باعث عسیر کے 19 ڈیم بھر چکے ہیں جبکہ وادیوں میں پانی کا بہاؤ شدت کے ساتھ جاری ہے‘۔

سبق ویب سائٹ کے مطابق متعلقہ ادارے نے پانی کی سطح بلند ہوجانے پر ڈیموں کے دروازے کھول دیئے ہیں جبکہ وادیوں کے رہائشیوں کو  مکانات خالی کرنے کا مطالبہ کیا ہے۔

عسیر کے میئر نے کہا ہے کہ ’عسیر کا سب سے بڑا ڈیم غالبہ ہے جس میں انتہائی حد 217 مکعب میٹر پانی بھر چکا ہے اور یہی حال باقی ڈیموں کا بھی ہے، ڈیموں کو بچانے کے لیے تمام دروازے کھول دیئے گئے ہیں‘۔

انہوں نے ریجن کے شمالی علاقوں کے رہائشیوں کو خبردار کرتے ہوئے محکمہ شہری دفاع کی ہدایات پر عمل کرنے کی تاکید کی ہے‘۔

انہوں نے کہا ہے کہ ’سیلاب کے خطرے کے باعث تمام امدادی اداروں میں ہنگامی حالت نافذ ہے جبکہ محکمہ موسمیات کی رپورٹ کے مطابق بارش کا سلسلہ آئندہ دنوں میں بھی جاری رہے گا‘۔

انہوں نے رہائشیوں کو وادیوں، نشیبی علاقوں، سیلاب کی گزر گاہوں اور پر خطر مقامات سے دور رہنے کی ہدایت کی ہے‘۔