اسپیکر منصب کے اہل نہیں، مستعفی ہوجائیں،عمران

اسلام آباد... تحریک انصاف کے سربراہ عمران خان نے اسپیکر ایاز صادق سے فوری طور پر مستعفی ہونے کا مطالبہ کیا ہے۔ایک بیان میں انہوں نے کہا کہ جسٹس آصف سعید کھوسہ کے خلاف ریفرنس سے ثابت ہوگیا کہ ایازصادق، نواز شریف کی کرپشن بچارہے ہیں۔ اسپیکر کے ریفرنس سے بدنیتی صاف جھلکتی ہے۔انہوں نے کہا کہ ایاز صادق پہلے ہی خود کو متعصب ظاہر کرچکے تھے۔ آج انہوں نے ثابت کردیا کہ وہ اسپیکر کے منصب کے بھی اہل نہیں۔ انہو ں نے کہا کہ ایاز صادق کا یہ کہنا کہ انکا دفترتحقیقاتی ادارہ نہیں کئی سوال جنم دیتا ہے۔ انہوں نے سوال اٹھایا کہ ایازصادق نے میرے اور جہانگیر ترین کیخلاف الیکشن کمیشن ریفرنسز کیسے بھجوائے؟ ایاز صادق کے پاس تحقیقات کی صلاحیت نہیں تو نواز شریف کیخلاف ریفرنس کیسے مسترد کیا؟ انہوں نے کہا کہ ن لیگ کرپشن بچانے کیلئے ہر حد تک جانے پر آمادہ دکھائی دیتی ہے۔