نیو یارک...اقوام متحدہ میں پاکستان کی مستقل مندوب ملیحہ لودھی نے کہا ہے کہ پاکستان سرحد پاردہشت گردی کا شکار ہے۔ ٹی ٹی پی، جماعت الاحرار سمیت 20 تنظیمیں افغانستان سے پاکستان پر حملوں میں ملوث ہیں۔ اپنی سرزمین پر افغان جنگ لڑنے کو تیار نہیں۔سلامتی کونسل میں مباحثے کے دوران انہوں نے کہا کہ افغان حکومت اورطالبان میں امن عمل ناگزیر ہے۔ امن عمل سے جنگ کو سیاسی اختتام تک پہنچانے میں مدد ملے گی۔ افغان مسئلے کا کوئی فوجی حل نہیں،اس پر عالمی برادری بھی متفق ہے۔انہوںنے کہا کہ طالبان تشدد ترک کر کے مذاکرات کا راستہ اختیار کریں ۔ ملیحہ لودھی نے کہا کہ افغان طالبان اور حکومت میں جامع مذاکرات کی ضرورت ہے۔ماضی میں بار بار ناکام ہونے والی کوئی حکمت عملی دوبارہ مسلط نہیں کی جا سکتی۔ داعش ،القاعدہ اور ان سے منسلک ٹی ٹی پی اور دیگر تنظیموں کو شکست دینا ہوگی۔انہوںنے کہا کہ پاکستان نے 2لاکھ فوجیوں کے ذریعے دہشت گردی کیخلاف کامیاب جنگ لڑی۔ سرحدی علاقے سے دہشت گردوں کا صفایا کردیا۔سرحد کے آرپار حملے اور دہشت گردوں کی نقل و حمل روکنے کیلئے موثر اقدامات ناگزیر ہیں۔
