اسحاق ڈار لندن کے اسپتال میں داخل، اینجیو پلاسٹی متوقع

 لندن.... وفاقی وزیر خزانہ اسحاق ڈار ویسٹ لندن کے اسپتال میں داخل کرلئے گئے جہاں ان کی اینجیوپلاسٹی کیے جانے کا امکان ہے۔ذرائع نے بتایا کہ اسحاق ڈار بدھ کو بھی اسپتا ل آئے تھے اور اینجیوگرافی کی گئی تھی۔اسحاق ڈار گزشتہ ہفتے تفصیلی معائنے کیلئے 3 بار اسپتال آئے تھے۔ذرائع کے مطابق ڈاکٹروں نے اسحاق ڈار کو لندن میں قیام بڑھانے کی ہدایت کی ہے اور ترجیحی بنیادوں پر علاج کی درخواست کی ہے۔اسحاق ڈار کے ساتھ ان کے بیٹے علی ڈار اور دیگر اہل خانہ بھی موجود ہیں۔علی ڈار کی اہلیہ اسماءاپنی والدہ بیگم کلثوم نواز کی دیکھ بھال کے سلسلے میں لندن کے ایک اسپتال میں موجود ہیں۔اسحاق ڈار کے وکیل نے نیب عدالت کو بتایا تھا کہ ان کے موکل لندن میں موجود ہیں اور علاج کروارہے ہیں اور آئندہ 24 گھنٹوں میں دوبارہ معائنہ متوقع ہے ۔واضح رہے کہ نیب نے پاناما کیس کے فیصلے کی روشنی میں اسحاق ڈار کے خلاف آمدن سے زائد اثاثوں کا ریفرنس دائر کیا ۔