ریاض...پاک فضائیہ کے سربراہ ائیرچیف مارشل سہیل امان کو ریاض میں کنگ عبدالعزیز میڈل آف ایکسیلینس ایوارڈ سے نوازا گیا۔ اس سلسلے میں پروقار تقریب کا انعقاد کیا گیا جس میں جنرل عبدالرحمان بن صالح البنیان، چیف آف جنرل اسٹاف رائل سعودی آرمڈ فورسز نے سعودی حکومت کی طرف سے پاک فضائیہ کے سربراہ کو یہ ایوارڈعطا کیا۔ یہ ایوارڈ پا ک فضائیہ کی جانب سے رائل سعودی فضائیہ کو مختلف شعبہ جات میں بھرپور تعاون فراہم کرنے اور بالخصوص ائیرچیف مارشل سہیل امان کی دونوں فضائی افواج کے درمیان دوستانہ تعلقات کے فروغ میں دی جانے والی شاندار خدمات کے اعتراف میں عطا کیاگیا ہے۔ترجمان پاک فضائیہ کے مطابق ائیر چیف نے جنرل عبدالرحمان بن صالح البنیان، چیف آف جنرل اسٹاف رائل سعودی آرمڈ فورسز سے ان کے آفس میں ملاقات بھی کی۔ ائیر چیف نے پاکستان میں انسداد دہشت گردی آپریشنز میں پاک فضائیہ کے کلیدی کردار پر روشنی ڈالی۔انہوں نے سعودی عرب کے ساتھ ایوی ایشن کے میدان میں موجود تعلقات کو مزید مستحکم کرنے کا اعادہ کیا ۔ جنرل عبدالرحمان بن صالح البنیان نے دونوں برادر ممالک کے درمیان دفاعی تعلقات کے فروغ میں ائیر چیف کی خدمات کو سراہا۔ انہوں نے آپریشن ضرب عضب میں پاک فضائیہ کے کردار کی تعریف کی اور اسے دنیا کی دوسری فضائی افواج کے لئے رول ماڈل قرار دیا ۔ ائیر چیف نے سعودی عرب کی وزارت دفاع کا دورہ بھی کیا جہاں انہوں نے سعودی عرب کے نائب وزیر دفاع محمد عبداللہ العیش سے ملاقات کی ۔
