پریمیئر فٹبال لیگ: محمد صلاح کی ہیٹ ٹرک ، میچ میں 4 گول کئے

لندن:پریمیئر لیگ کے میچ میں لیور پول نے واٹ فورڈ کو 0-5سے ہرا دیا۔ محمد صلاح نے 4 گول کئے۔انہوں نے پریمیئر لیگ میں پہلی ہیٹ ٹرک بھی مکمل کی۔ گولڈن بوٹ کی دوڑ میں انہوں نے ہیری کین کو پیچھے دھکیل دیا۔ صلاح نے میچ شروع ہونے کے 4 منٹ بعد ہی پہلا گول کردیا جبکہ دیگر2گول انہوں نے اپنے دائیں پاوں کو استعمال کرتے ہوئے کیا ، گزشتہ دنوں انہیں دائیں پاوں میں تکلیف کا سامنا رہا تھا۔ صلاح نے تیسرا گول روبرٹو فرمینو کے پاس پر کیا۔ مصری نژاد صلاح اس وقت فٹبال کی دنیا کے بے تاج بادشاہ بننے جارہے ہیں اور وہ فٹبال کی بلندیوں پر ہیں۔ اب تک وہ 36 گول کرچکے ہیں جن میں سے 28 گول تو صرف پریمیئر لیگ کے میچوں میں اسکور کئے۔ لیور پول کے مینجر نے صلاح کی تعریف کرتے ہوئے کہا کہ میں نہیں سمجھتا کہ محمد صلاح اپنا مقابلہ لیونل میسی سے کرنا چاہتے ہیں تاہم میں یہ ضرور سمجھتا ہوں کہ وہ اسی کے نقش قدم پر چل رہے ہیں۔ ان کا کھیل جنونی ہے اور یہی وجہ ہے کہ وہ اپنی مہارت سے اور مسلسل توجہ کے نتیجے میں آگے نکل رہے ہیں۔ انہوں نے کہا کہ صلاح اب کھیل میں دلچسپی رکھتے ہیں، مستقل مزاجی کے نتیجے میں انہیں کامیابی نصیب ہوتی ہے۔ صلاح نے مسلسل 4 گول کرکے اپنی اہمیت جتا دی ہے۔ یہ چاروں گول بڑے ہی متاثر کن تھے۔ انہوں نے مشکل صورتحال کا سامنا کیا لیکن آخر میں کامیابی انہی کے نصیب میں لکھی گئی۔