مصباح الحق کی پی ایس ایل فائنل میں شرکت مشکوک
دبئی:پی ایس ایل میں اسلام آباد یونائیٹڈ کے کپتان مصباح الحق زخمی ہوگئے ان کے ہاتھ میں ہیر لائن فریکچر ہوگیا ہے جس کے نتیجے میں میچ میں ان کی شرکت مشکوک ہوگئی تھی۔پی ایس ایل کے تیسرے ایڈیشن کا پہلا کوالیفائر میچ دبئی میں اسلام آباد یونائٹیڈ اور کراچی کنگز کے مابین کھیلا گیا۔ پوائنٹس ٹیبل پر اسلام آباد سرفہرست اور کراچی کنگز نمبرٹو پر تھے۔ فاتح ٹیم نے براہ راست کراچی میں 25 مارچ کو فائنل تک رسائی حاصل کر لی۔ پلے آف سے قبل اسلام آباد یونائیٹڈ پریشانی میں مبتلا ہوگئی کیونکہ اس کے کپتان انجری کا شکار ہوگئے تھے۔ کراچی کنگز سے گزشتہ میچ کے دوران مصباح الحق کے ہاتھ میں گیند لگی تھی۔ مصباح الحق کی جگہ قیادت جے پی ڈومینی نے کی کیونکہ نائب کپتان رومان رئیس اور آندرے رسل پہلے ہی ٹورنامنٹ سے باہر ہو چکے ہیں۔ دوسری جانب کراچی کنگز کے اہم کھلاڑی شاہد آفریدی کے گھٹنے میں ایک بار پھر تکلیف کی اطلاعات سامنے آئی تھیں ان کی بھی میچ میں شرکت مشکوک بتائی جارہی تھی۔یاد رہے کہ کراچی کے کپتان عماد وسیم بھی انجری کی وجہ سے آخری دونوں میچز نہیں کھیل سکے اور قیادت ایون مورگن نے کی جو اچھی بیٹنگ فارم میں نظر نہیں آئے۔
