برسلز۔۔۔ سوئٹرزلینڈ کے شہر زیورخ میں ملازمین کی کم سے کم ماہانہ تنخواہ 5764 امریکی ڈالر ہے۔جرمنی کے’ ’ڈوئچے بینک‘‘ کی جانب سے جاری کردہ سالانہ’ ’عالمی نرخ میپ‘‘ کے نام سے ایک رپورٹ کے مطابق دنیا کے شہروں میں زیورخ میں ملازمین کی تنخواہیں سب سے زیادہ دی جاتی ہیں۔ فہرست میں سب سے زیادہ تنخواہیں دینے دینے والے شہروں میں زیورخ پہلے نمبر پر ہے۔دوسرے نمبر پر امریکی ریاست کیلیفورنیا کا شہر سان فرانسسکوہے جہاں اوسط تنخواہ 4974 امریکی ڈالر ہے۔نیویارک 4115 ڈالر تنخواہ کے ساتھ تیسرے نمبر پر ہے۔آسٹریلیا کے شہر سڈنی میں 3914 ڈالر، امریکی شہر بوسٹن میں 3740، ناروے کے شہر اوسلو میں 3664، شکاگو میں 3650، ڈنمارک کے شہر کوپن ہیگن میں 3462، امارات کے شہر دبئی میں 3447 اور جرمنی کے شہر فرینکفرٹ میں اوسط تنخواہ 3389 امریکی ڈالر ہے۔ رپورٹ میں دنیا کے ایسے 10 شہروں کے نام جاری کیے گئے ہیں جو اپنے ملازمین کو سال بھر کے دوران سب سے زیادہ تنخواہیں اور مالی مراعات فراہم کرتے ہیں۔’ ’ڈوئچے بینک‘‘ ہرسال مئی میں’ ’عالمی نرخ میپ‘‘ کے نام سے ایک رپورٹ جاری کرتا ہے جس میں مہنگائی، ملازمین کی تنخواہیں، شہریوں کی اوسط آمدن اورٹیکسوں سمیت دیگر امور پر بحث کی جاتی ہے۔رپورٹ میں بتایا گیا ہے کہ ایسے شہر جہاں پر ملازمین کی ماہانہ تنخواہیں کم سے کم 3 ہزار امریکی ڈالر سے زیادہ ہیں، سب سے زیادہ مشاہرے دینے والے شہروں میں شمار کیے جاتے ہیں۔
