تحریک انصاف نے مصالحتی کمیٹی تشکیل دیدی
اسلام آباد... تحریک انصاف کی جانب سے قومی اور صوبائی اسمبلی کی نشستوں کےلئے امیدواروں کے ناموں کا حتمی اعلان سامنے آنے کے بعد کارکنان نے انتخابی ٹکٹ کی تقسیم پر تحفظات کا اظہار کردیا۔ پارٹی نے مصالحتی کمیٹی’ تشکیل دینے کا فیصلہ کرلیا تاکہ اختلافات کو دور کیا جا سکے۔ذرائع کے مطابق مصالحتی کمیٹی کی تشکیل کا فیصلہ پی ٹی آئی کے چیئرمین عمران خان کی سربراہی میں میڈیا اسٹریٹجک ٹیم کے اجلاس کے دوران کیا گیا۔پی ٹی آئی کے سیکرٹری اطلاعات فواد چوہدری نے بتایا کہ مصالحتی کمیٹی مرکز، صوبائی اور ضلعی سطح پر عہدیداروں اور ورکرز کے تحفظات کو دور کرکے انہیں اعتماد میں لے گی۔انہوں نے امید ظاہر کی کہ کمیٹی کے ارکان ناراض ورکرز اور پارٹی کارکن کو راضی کرکے بحرانی کیفیت کو ختم کردے گی۔فواد چوہدری نے کہاکہ پارٹی ورکرز کی جانب سے تحفظات کا اظہار فطری ہے ۔ہر امیدوار کو ٹکٹ دینا ممکن نہیں ۔ پارٹی نے پنجاب میں ان امیدواروں کو ٹکٹ تفویض کئے ہیں جو ‘مضبوط اور ہیوی ویٹ سیاستدان ہیں۔
