اطالوی کلب جوونٹس کو دوسری فتح ،پاﺅلو ڈیبالا کی ہیٹ ٹرک

ٹورین:اطالوی کلب جوونٹس کے نوجوان کھلاڑی پاولو ڈیبالا نے شاندار ہیٹ ٹرک کے ذریعے ٹیم کو0-3سے فتح دلا دی ۔ چیمپیئنز لیگ کے میچ میں ڈیبالا سوئس کلب ینگ بوائز کے خلاف میچ میں چھائے رہے اور یکے بعد دیگرے 3گول کرنے میں کامیاب رہے ۔ کلب کے نئے کھلاڑی کرسٹیانو رونالڈو بھی یہ میچ دیکھ رہے تھے جو پابندی کی وجہ سے میدان میں نہیں اتر پائے۔ رونالڈو اور ان کے اہلخانہ نے بھی یہ میچ دیکھا۔ڈیبالا نے میچ کے پانچویں منٹ میں پہلا گول کیا اور پھر 33ویں اور 69ویں منٹ میں مزید2گول کرکے نہ صرف اپنی ہیٹ ٹرک مکمل کی بلکہ ٹیم کی فتح بھی یقینی بنا دی ۔اس سے پہلی فتح میں رونالڈو نے بھی حصہ ڈالا تھا تاہم ویلنسیا کے خلاف میچ کے دوران حریف کھلاڑی کو سر کے بالوں سے پکڑ کر اٹھانے کی کوشش ان کیلئے مہنگی ثابت ہوئی اور انہیں ریڈ کارڈ ملنے کے ساتھ ایک میچ کے لئے باہر بھی ہونا پڑا۔

کھیلوں کی مزید خبریں پڑھنے کیلئے اردونیوز " واٹس ایپ اسپورٹس" گروپ  جوائن کریں