جدہ۔۔۔ سابق نگراں وزیر اورپاکستان کی معروف کاروباری شخصیت سردارتنویر الیاس خان نے کہا کہ پاکستان اور سعودی عرب کے درمیان قریبی تعلقات ہیں جس میں ہر گزرتے دن میں اضافہ ہو رہا ہے۔ پاکستان اور سعودی عرب ایک فیملی کی طرح ہے۔ انہوں نے کہا کہ گزشتہ30 سال سے ایک عید یہاں ضرور کرتا ہوں۔ سعودی حکومت کو یہ کریڈٹ جاتا ہے کہ وہ ہرسال لاکھوں زائرین کی میزبانی کرتی ہے اور لوگوں کی توقعات پر پوری اترتی ہے۔ یہ انتہائی مشکل کام ہے جو سعودی حکومت بڑے احسن طریقے سے کرتی آ رہی ہے۔ پاکستان اور کشمیر کمیونٹی کی طرف سے ا پنے اعزاز میں تقریب سے خطاب کرتے ہوئے انہوںنے نگران حکومت کے دور میں پنجاب میں منصوبے رو کنے کے پروپیگنڈے کو مسترد کر تے ہوئے کہاکہ میرے پاس پنجاب کی 3 بڑی وزارتیں تھیں ،ایک پلاننگ اینڈ ڈیو لپمنٹ بھی تھی۔ اپنی وزارت کے دوران میں نے کوئی منصوبہ نہیں روکا تاہم قومی مفاد کے منصوبوں کو ترجیحی بنیادوں پر جاری رکھا۔ سردار تنویر الیاس خان نے کہا کہ اپنے مختصر وقت کو ضائع نہیں کیا بلکہ شو آف کی بجائے دن رات کام کر کے محکموں کی زبوں حالی کو بہتر بنایا اور محکمے اب اسی ٹریک پرچل رہے ہیں۔انہوں نے کہا کہ پاکستان کا انحصار زراعت پر ہے، زراعت کا 70 فیصد انحصار پنجاب پر ہے۔انہوںنے کہا کہ ہنگامی بنیادوں پر اس شعبے میں ممکنہ تبدیلیاں لائیں اور رکے ہوئے منصوبے اورکام آگے بڑھائے۔ اسی طرح محکمہ خوراک میں بھی اصلاحات لائیں۔مختصر وقت میں بہتر کام کے نتیجے میں جب الوداعی تقریب ہوئی تو سرکاری افسران کی آنکھوں میں آنسو تھے۔انہوں نے کہا کہ جب پرائیویٹ سیکٹر میں کوئی مار کھا کر آتا ہے تو اسے علم ہوتا ہے اور وہ کام کرتا ہے۔قبل ازیں سردار تنویر الیاس نے صدر مملکت عارف علوی کے ہمراہ روضہ رسول پر حاضری دی اور مسجد نبوی شریف میں نوافل ادا کئے بعد ازاں مکہ مکرمہ پہنچ کر عمرہ کی سعادت حاصل کی۔ اس موقع پر صدر پاکستان کے ہمراہ انہیں خانہ کعبہ کے اندر جانے کی سعادت بھی نصیب ہوئی ۔انہوں نے خانہ کعبہ کے اندر نوافل ادا کئے ملت اسلامیہ، کشمیر کی جلد آزادی پاکستان کی سلامتی، ترقی و خوشحالی اور امن و امان کےلئے خصوصی دعا کی۔
