نواز شریف کی والدہ کی بیٹے کیلئے دعائیں

لاہور... سابق وزیر اعظم نواز شریف سے پارٹی رہنماوں اور کارکنوں اور شریف فیملی کے ارکان نے کوٹ لکھپت جیل میں ملاقاتیں کیں ۔ سابق وزر یر اعظم سے ان کی والدہ بیگم شمیم اختر، صاحبزادی مریم نواز، داماد کیپٹن (ر) محمد صفدر، بھتیجوں حمزہ شہباز، یوسف عباس شریف، عزیز عباس شریف ، وزیر اعظم آزاد کشمیر راجہ فاروق حیدر، سابق گورنر سندھ محمد زبیر،اقبال ظفر جھگڑا، امیر مقام، تہمینہ دولتانہ، پرویز ملک، سلیم ضیائ، انجم عقیل ، طارق فضل چوہدری ، میاں مرغوب ،خواجہ عمران نذیرسمیت اراکین قومی وصوبائی اسمبلی اور کارکنوں نے ملاقات کی اور ان کی صحت بارے دریافت کیا ۔ نواز شریف کی والدہ اپنے بیٹے کی درازی عمر اور مشکلات کے حل کےلئے دعائیں دیتی رہیں ۔اہل خانہ نواز شریف کی پسند کا کھانا ہمراہ لائے جو سب نے اکٹھے کھایا ۔نواز شریف نے پارٹی رہنماوں سے ملاقاتوں میں ملک کی موجودہ اور مجموعی سیاسی صورتحال پر بھی گفتگو کی ۔ذرائع کے مطابق نواز شریف نے مہنگائی او رخصوصاً معیشت کی صورتحال پر اپنی تشویش ظاہر کی ۔ن لیگ کے کارکنوں کی بڑی تعداد بھی نواز شریف اور شریف خاندان سے اظہار یکجہتی کےلئے کوٹ لکھپت جیل کے باہر موجود رہی ۔