ون ڈے سیریز: فتح سے سیریز کا آغاز کرینگے،سرفراز احمد

  پورٹ الزبتھ:پاکستان اور جنوبی افریقہ کے درمیان ون ڈے سیریز کا پہلے میچ سے قبل پاکستانی کپتان سرفراز احمد کا کہنا ہے کہ جنوبی افریقہ کے خلاف پہلے ون ڈے میں فتح کے ساتھ سیریز کا آغاز کرنا چاہتے ہیں۔ پریس کانفرنس میں پاکستانی کپتان نے کہا کہ کسی بھی سیریز کا پہلا میچ اہم ہوتا ہے۔کوشش کریں گے کہ فتح کے ساتھ اس کا آغاز کریں تاکہ ٹیم کو اعتماد حاصل ہو سکے جو سیریز کے باقی میچوں میں ہمارے کام آئے گا۔ ایک سوال پر سرفراز احمد نے کہا کہ جنوبی افریقی کنڈیشنز میں کھیلے جانے والے ون ڈے میچز میں ہدف کا تعاقب کرتے ہوئے مشکل پیش آتی ہے اس لئے اگرپہلے بیٹنگ کا موقع ملا تو بڑا اسکور کرنے کی ہر ممکن کوشش کریں گے۔ سرفراز احمد نے کہا کہ یہ سیریز ورلڈ کپ کی تیاریوں کے حوالے سے بھی اہم ہے۔ سیریز کے دوران مختلف کمبی نیشن آزمائیں گے۔ فخرزمان ٹیم کے اہم کھلاڑی ہیں، اوپنر کو نیچرل گیم کھیلنے کے لئے کہا جاتا ہے لیکن ان کا کریز پر قیام بھی ٹیم کیلئے ضروری ہے۔دوسری صورت میں آنے والے بیٹسمینوں پر دباو بڑھ جاتا ہے۔ جنوبی افریقہ کو ہوم گراونڈ پر ہرانا مشکل چیلنج ہے لیکن شائقین کو اچھی کرکٹ دیکھنے کو ملے گی۔

 کھیلوں کی مزید خبریں اور تجزیئے پڑھنے کیلئے واٹس ایپ گروپ"اردو نیوزاسپورٹس"جوائن کریں