سعودی فارماسسٹ کی ٹریننگ کے لیے جرمن کمپنی سے معاہدہ

سعودی عرب کی فارمیسیوں پر بھرتی کی غرض سے سعودی نوجوانوں کو تربیت دینے کے لیے جرمن دوا ساز کمپنی سے معاہدہ کیا گیا ہے جس کا
مقصد سعودی فارماسسٹ کو تربیت دینا اور یونیورسٹیوں میں تدریسی عملے کو مشترکہ تحقیقی منصوبے شروع کرنے کا موقع فراہم کرنا ہے۔

سعودی پریس ایجنسی ایس پی اے کے مطابق کنگ عبد العزیز یونیورسٹی اور ام القری یونیورسٹی نے جرمنی کی دوا ساز کمپنی میرک کے ساتھ ایک معاہدے پر دستخط کیے ہیں۔

ان معاہدوں پر کنگ عبد العزیز یونیورسٹی اور ام القری یونیورسٹی میں فارمیسی کے ڈین ڈاکٹر ہانی زکریا اصفور اور ڈاکٹر فیصل بن عتیق المالکی کے سعودی عرب میں مرک کے کنٹری منیجر ڈاکٹر ہیشام حبشی کے ہمراہ بالترتیب دستخط ہوئے ہیں۔

معاہدے کے مطابق یونیورسٹیوں کے چھ سے آٹھ انڈرگریجویٹ ، انٹرنشپ اور گریجویٹ مرد و خواتین طلباء جرمنی کی میرک فارماسیوٹکل کمپنی میں تربیت حاصل کریں گے۔

اس موقع پر ڈاکٹر فیصل المالکی نے کہا کہ یہ معاہدہ دواسازی کی تربیت کے شعبے میں ایک احسن قدم ہے۔ المالکی نے کہا کہ ام القری یونیورسٹی نے میرک کمپنی کے ساتھ اپنے معاہدے کو بہت اہمیت دی ہے۔ یونیورسٹی کا خیال ہے کہ نجی شعبہ اس کامیابی میں اہم شراکت دار ہے۔

انہوں نے کہا کہ یہ معاہدہ سرکاری اور نجی شعبے کے مابین شراکت کے دائرہ میں آتا ہے۔ سعودی نوجوانوں کی خدمت اور ان کی صلاحیتوں کو نکھارنے کے لیے تربیتی عمل میرک کمپنی کا ایک اہم قدم ہے۔

• سعودی عرب کی خبروں کے لیے واٹس ایپ گروپ جوائن کریں