پاکستان میں مزید 26 ہلاک، 806 نئے کیسز

پاکستان میں کورونا وائرس سے گزشتہ 24 گھنٹوں میں مزید 26 مریض ہلاک ہوگئے ہیں جس کے بعد ملک میں ہلاکتوں کی تعداد  327 ہو گئی ہے۔

 سرکاری اعداد وشمار کے مطابق پاکستان میں اس وقت کورونا وائرس کے 14 ہزار 885 کیسز ہیں جبکہ گزشتہ 24 گھنٹوں میں 806 نئے کیسز سامنے آئے ہیں۔

پاکستان میں تین ہزار 425 افراد کورونا وائرس کا شکار ہونے کے بعد صحت یاب بھی ہوئے  اور اس وقت 717 ہسپتالوں میں تین ہزار 687 مریض زیرعلاج ہیں، دیگر متاثرین کو گھروں میں ہی قرنطینہ کیا گیا ہے۔

ملک کے سب سے زیادہ آبادی والے صوبے پنجاب میں مرنے والوں کی تعداد 100 ہو گئی ہے جبکہ متاثرین کی تعداد پانچ ہزار 827 ہے۔

سندھ میں پانچ ہزار 291 افراد میں وائرس پایا گیا ہے جبکہ صوبے میں مرنے والوں کی تعداد 92 ہو گئی ہے۔ خیبر پختونخوا میں اب تک 114 ہلاکتیں ریکارڈ کی گئی ہیں جبکہ دو ہزار سے زائد افراد کے کورونا ٹیسٹ مثبت آئے ہیں۔ بلوچستان میں 915 افراد کورونا سے متاثر ہوئے اور 14 مریض ہو چکے ہیں۔

 دارالحکومت اسلام آباد میں 297 جبکہ گلگت بلتستان میں 330 مریضوں کے کورونا ٹیسٹ مثبت آئے۔ پاکستان کے زیرانتظام کشمیر میں اب تک کل 65 کورونا کیسز ہیں۔

سرکاری اعداد وشمار کے مطابق اب تک ملک میں ایک لاکھ 65 ہزار 911 کورونا ٹیسٹ کیے جا چکے ہیں۔