’ترقیاتی منصوبوں کے لیے فنڈز کی فراہمی جاری رہے گی‘
’ترقیاتی منصوبوں کے لیے فنڈز کی فراہمی جاری رہے گی‘
ہفتہ 30 مئی 2020 5:29
وزیر خزانہ کے مطابق بنیادی ڈھانچے کے منصوبے نجی اداروں کو دیے جائیں گے۔ فوٹو: ٹوئٹر
سعودی وزیر خزانہ و قائم مقام وزیر اقتصاد و منصوبہ بندی محمد الجدعان نے کہا ہے کہ معاشی سرگرمیوں کی مرحلہ وار بحالی کورونا بحران سے نمٹنے کی نئی منزل ہے۔ نئے اقدامات ملک کے سماجی و صحت کے حالات کو مستحکم بنانے کی سکیم کا اہم حصہ ہیں.
سعودی خبررساں ادارے ایس پی اے کے مطابق وزیر خزانہ نے ایک بیان میں کہا کہ نئے اقدامات کا فیصلہ وزارت صحت سمیت تمام متعلقہ اداروں کے ساتھ یکجہتی پیدا کرکے کیا گیا ہے. حکومت سماجی حالات اور صحت کے تحفظ کے ساتھ اقتصادی سرگرمیوں میں توازن پیدا کرنا اور رکھنا چاہتی ہے.
الجدعان نے واضح کیا کہ سعودی حکومت ترقیاتی سکیمیں جاری رکھے گی. ذرائع آمدنی میں تنوع پیدا کرنے، نجی اداروں کا کردار مضبوط بنانے اور ملکی پیداوار کو فروغ دینے کی پالیسی پر گامزن ہے اور رہے گی.
وزیر خزانہ کا کہنا تھا کہ حکومت قومی بجٹ سے ترقیاتی منصوبوں کو فنڈ فراہم کرتی رہے گی. بنیادی ڈھانچے کے منصوبے بڑے پیمانے پر نجی اداروں کو دیے جائیں گے.
ترقیاتی اور پبلک انویسٹمنٹ فنڈ شرح نمو کو بہتر بنانے میں اہم کردارادا کریں گے (فوٹو: ٹوئٹر)
وزیر خزانہ نے کہا کہ ترقیاتی فنڈ اور پبلک انویسٹمنٹ فنڈ شرح نمو کو بہتر بنانے میں اہم کردارادا کریں گے. سعودی عریبین مانیٹری اتھارٹی (ساما) نے 150 ارب ریال مارچ اور اپریل کے مہینوں میں استثنائی طور پر پبلک انویسٹمنٹ فنڈ کو دیے. یہ اقدام بہت سوچ سمجھ کر کیا گیا.
الجدعان کا کہنا تھا کہ اقتصادی و تجارتی ادارے اور عوام صحت اقدامات کی پابندی جتنی زیادہ کریں گے اتنی ہی تیزی سے اقتصادی سرگرمیاں بحال ہوتی چلی جائیں گی.
