تاج محل نہ کھولنے کا فیصلہ

انڈیا نے تاریخی مقامات سیاحوں کے لیے کھولنے کا فیصلہ تو کر لیا ہے لیکن سیاحوں کی پہلی پسند تاج محل کے دروازے اب بھی بند ہیں۔

انڈین حکومت نے پیر کو تاریخی مقامات کھولنے کا فیصلہ کیا تھا۔

تاہم ملک بھر میں کورونا کی وبا کی صورت حال اور بطور خاص آگرہ کے حالات کو دیکھتے ہوئے ضلعی انتظامیہ نے محکمہ آثار قدیمہ کے ساتھ میٹنگ کی اور کہا ہے کہ تاج محل سمیت شہر کے آس پاس کے تاریخی مقامات نہیں کھولے جا رہے ہیں۔ 

مقامی میڈیا کے مطابق ضلع مجسٹریٹ پربھوناتھ سنگھ نے کہا ہے کہ ’آگرہ میں کورونا کی موجودہ صورتحال پر غور کرتے ہوئے تاج محل، آگرہ قلعہ، سکندرہ اور فتح پور سیکری جیسی تمام یادگاروں کو ’بفر زون‘ کے طور تسلیم کرتے ہوئے اگلے احکامات تک نہ کھولنے کا فیصلہ کیا گیا ہے۔‘

انھوں نے مزید بتایا کہ کوئی بھی مذہبی مقام زائرین کے لیے کھلا نہیں ہوگا۔

دوسری جانب دہلی کی تاریخی یادگار قطب مینار پر چند مقامی سیاح نظر آئے لیکن وہاں زیادہ تر سناٹا پھیلا رہا۔

ایک ٹوئٹر صارف شاہنواز شاہ نے صبح دفتر جاتے ہوئے قطب مینار کے سامنے کی تصاویر پوسٹ کی جس سے ظاہر ہو رہا ہے کہ وہاں سیاح نہیں آ رہے ہیں۔

دی نیو انڈین ایکسپریس میں شائع ایک رپورٹ کے مطابق تقریباً 100 افراد نے قطب مینار کی سیر کی جبکہ ہمایوں کے مقبرے کے لیے تقریباً دو درجن افراد ہی پہنچے۔

محکمہ آثار قدیمہ کے مطابق دہلی کے تاریخی مقامات میں ایک سے چار فیصد کے درمیان ہی لوگ پہنچے۔

دریں اثنا وزارت صحت نے کہا ہے کہ ملک میں کورونا کے سات لاکھ سے زیادہ مثبت کیسز سامنے آ چکے ہیں اور انڈیا اب امریکہ اور برازیل کے بعد تیسرے نمبر پر آ گیا ہے۔  

انڈیا میں کورونا وائرس کے کیسز کی مجموعی تعداد سات لاکھ 19 ہزار 665 ہے جبکہ چار لاکھ سے زیادہ افراد اس سے صحت یاب ہو چکے ہیں۔

گذشتہ 24 گھنٹوں میں کورونا کے مزید 22 ہزار سے زیادہ کیسز سامنے آئے ہیں۔ چھ سے سات لاکھ کی تعداد صرف پانچ دنوں میں سامنے آئی ہے۔

گذشتہ 24 گھنٹوں میں کورونا سے 467 مزید افراد ہلاک ہو گئے ہیں جس کے ساتھ ہلاکتوں کی تعداد 20 ہزار سے تجاوز کرگئی ہے۔

جنوبی ریاست کرناٹک کے دارالحکومت بنگلورو میں کورونا کی وجہ سے 20 پولیس سٹیشنوں کو بند کر دیا گیا ہے کیونکہ ان میں پولیس اہلکاروں کے ٹیسٹ مثبت آئے ہیں اور ان تھانوں میں شکایت درج کرنے کے لیے ایک شخص کو باہر بٹھایا گیا ہے۔