برطانیہ: لاکھوں اینٹی باڈیز ٹیسٹ کا منصوبہ

برطانیہ کی حکومت ایک خفیہ ٹرائل کی کامیابی کے بعد ملک میں لاکھوں کورونا وائرس اینٹی باڈیز ٹیسٹ کرنے کا منصوبہ بنا رہی ہے۔

برطانوی اخبار گارڈین کے مطابق انسانوں پر کیے جانے والے ٹرائلز میں یہ بات سامنے آئی ہے کہ یہ ٹیسٹ 98.6 فیصد تک درست ہے اور 20 منٹ میں ہو جانے والے ٹیسٹ سے معلوم کیا جا سکتا ہے کہ کوئی شخص کبھی بھی کورونا کا شکار رہا ہے یا نہیں۔

یہ ٹیسٹ ’یو کے ٹیسٹ کنسورشیم‘ نے آکسفورڈ یونیورسٹی کی شراکت سے تیار کیا ہے۔

برطانوی حکومت کے اینٹی باڈیز ٹیسٹنگ پروگرام کے سربراہ اور آکسفورڈ یونیورسٹی میں میڈیسن کے پروفیسر سر جان بیل نے کہا ہے کہ ’تیزی سے کیا جانے والا یہ ٹیسٹ حیرت انگیز ہے اور ہم اسے اپنے بل بوتے پر خود کر سکتے ہیں۔‘

تاہم برطانوی حکومت کے لیے یہ ٹیسٹ بڑے پیمانے پر کرنے میں مسائل بھی ہیں۔ مارچ میں برطانوی وزیراعظم بورس جانسن نے کہا تھا کہ چین سے آرڈر کیے گئے ٹیسٹ ’گیم چینجر‘ ثابت ہوں گے، لیکن وہ غیر موثر ثابت ہوئے۔

ابھی تک برطانیہ میں اینٹی باڈیز کے لیے ایک ہی ٹیسٹ منظور کیا گیا ہے جو بلڈ سیمپل لے کر کیا جاتا ہے اور اس کا نتیجہ کئی دن کے بعد ملتا ہے۔

اُمید کی جا رہی ہے کہ آئندہ چند ہفتوں میں اس ٹیسٹ کی ریگولیٹری منظوری مل جائے گی اور اس کے لیے برطانیہ کے اندر فیکٹریوں میں لاکھوں پروٹو ٹائپ تیار کر لیے گئے ہیں۔

وزرا کا کہنا ہے کہ ’اے بی سی 19 لیٹرل فلو‘ نام کا یہ ٹیسٹ رواں برس کے آخر تک بڑے پیمانے پر سکریننگ کے لیے دستیاب ہو جائے گا۔

اُمید کی جا رہی ہے کہ برطانیہ میں یہ ٹیسٹ فری ہوگا اور یہ مارکیٹ کے بجائے آن لائن مہیا کیا جائے گا۔