’موٹروے واقعے میں ملوث ملزم گرفتار، اعترافِ جرم کر لیا‘

سیالکوٹ لاہور موٹر وے پرایک خاتون کے ساتھ مبینہ زیادتی کے واقعے میں ملوث شفقت علی نامی مجرم گرفتار ہو گیا ہے۔

وزیراعلیٰ پنجاب عثمان بزدار نے پیر کو اپنی ایک ٹویٹ میں بتایا کہ ’لاہور سیالکوٹ موٹروے کے دلخراش واقعے میں خاتون سے زیادتی میں ملوث شفقت علی گرفتار ہو چکا ہے، جس کا ڈی این اے میچ کر چکا ہے اور اس نے اعتراف جرم بھی کر لیا ہے۔‘

انہوں نے مزید لکھا کہ ’ملزم عابد علی کی گرفتاری کے لیے بھی ہماری ٹیم مسلسل کوشاں ہے جس کی گرفتاری انشاء اللہ جلد متوقع ہے۔‘

دوسری جانب پیر کو لاہور ہائیکورٹ کے چیف جسٹس قاسم خان نے موٹر وے ریپ واقعے کے حوالے سے کہا ہے کہ 'ملک میں یہ تاثر پھیل گیا ہے کہ سڑک پر ہماری بیٹیاں محفوظ نہیں، حکومت کو پوری قوم سے معافی مانگنی چاہیے۔'

عدالت کی جانب سے طلب کیے جانے کے بعد لاہور کے سی سی پی او عمر شیخ نے پیش ہو کر کمرہ عدالت میں اپنے بیان پر معافی مانگ لی۔ کمرہ عدالت میں عمر شیخ نے کہا کہ انہیں ایسا بیان نہیں دینا چاہیے تھا۔

انہوں نے عدالت کو بتایا کہ وہ موٹر وے پولیس میں بھی خدمات انجام دیتے رہے ہیں۔

مزید پڑھیں

سی سی پی او کا کہنا تھا کہ جس علاقے میں ریپ کا واقعہ ہوا، بدقسمتی سے موٹر وے کے اس حصے پر پولیس تعینات نہیں تھی۔

چیف جسٹس قاسم خان نے کہا کہ ایک بچی گھر سے اس اعتماد کے ساتھ نکلی کہ موٹر وے محفوظ ہے۔ خاتون اور بچے کس کرب سے گزر رہے ہوں گے کسی کو احساس ہے؟ انہوں نے کہا کہ حکومت کی ذمہ داری ہے کہ شہریوں کو تحفظ فراہم کرے۔

لاہور ہائیکورٹ نے پنجاب پولیس کے سربراہ اور سی سی پی اور لاہور سے دو دن میں تفتیش کی پیش رفت رپورٹ طلب کی ہے۔

اس سے قبل ڈی ایس پی سی آئی اے ماڈل ٹاون حسنین اظہر نے اردو نیوز سے بات کرتے ہوئے بتایا تھا کہ موٹر وے واقعہ کے ایک مشتبہ ملزم وقار الحسن نے اپنے آپ کو پولیس کے حوالے کر دیا ہے۔

ڈی ایس پی کے مطابق ’ملزم خود ہی ماڈل ٹاون تھانے میں پہنچا اور خود کو قانون کے حوالے کر دیا۔ ابھی اس کو متعلقہ تفتیشی ٹیم کے حوالے کر دیا جائے گا۔‘

یاد رہے کہ بدھ 9 ستمبر کی رات سیالکوٹ لاہور موٹروے پر گجرپورہ کے قریب ایک خاتون کے ساتھ زیادتی اور ڈکیتی کا واقعہ پیش آیا تھا۔