’تیل کی فاضل پیداوار اوپیک کے لیے تباہ کن‘

سعودی وزیر توانائی شہزادہ عبدالعزیز بن سلمان نے  کہا ہے کہ مقررہ حد سے زیادہ تیل پیداوار اوپیک کی پہچان تباہ کردے گی-

الاخباریہ  کے  مطابق ان کا اشارہ تیل پیداوار میں کمی کے اوپیک پلس معاہدے میں شامل ان ملکوں کی طرف تھا جو معاہدے کی خلاف ورزی کرکے مقررہ کوٹے سے زیادہ تیل نکال رہے ہیں-

سعودی وزیر توانائی نے کہا کہ جن ملکوں  نے مقررہ حد سے زیادہ تیل  نکالا ہے انہیں سال رواں کے اختتام سے قبل ہی تلافی کرنا ہوگی اور ’مکمل پابندی ہی مشترکہ کاوشوں کی کلید ثابت ہوگی‘-

سعودی وزیر توانائی نے جمعرات کو ان خیالات کا اظہار اوپیک پلس کے آن لائن اجلاس میں کیا جو عالمی تیل منڈی میں صورتحال پر تبادلہ خیال کے لیے منعقد کیا گیا-

آر ٹی کے مطابق روسی وزیر توانائی نے کہا کہ ہمیں کورونا وائرس کے اثرات پر غور کرنا ہوگا-

روسی وزیرتوانائی نے تیل پیداوار میں کمی کے معاہدے کی مکمل پابندی کو ناگزیر قرار دیا- البتہ انہوں نے اس بات کا اعتراف کیا کہ اوپیک پلس معاہدے کی پابندی کا گراف خاصا اونچا ہے-

خود کو اپ ڈیٹ رکھیں، واٹس ایپ گروپ جوائن کریں