مکینک کو گاہک کی مرسڈیز کار کی سیر مہنگی پڑ گئی

انڈیا کے دارالحکومت نئی دہلی میں نشے میں دھت کار مکینک کے لیے ورکشاپ پر مرمت کے لیے کھڑی مرسڈیز کار کی سیر اس وقت بھاری پڑ گئی جب وہ ایک آٹو رکشے سے جا ٹکرائی اور تین راہ گیر بھی زخمی ہو گئے۔

انڈین نیوز چینل ای ڈی ٹی وی کے مطابق پولیس نے کار مکینک عالم کو گرفتار کر لیا ہے۔

پولیس تفتیش کے دوران مکینک نے بتایا کہ کار ایک گاہک کی تھی جو اسے مرمت کے لیے ورکشاپ پر چھوڑ گیا تھا۔

اس شخص نے پولیس کو بتایا کہ اس کی کار میں شراب تھی اور دو خواتین دوست بھی تھیں جنہیں وہ گھمانے کے لیے لے کر گیا تھا۔

ڈپٹی کمشنر پولیس آر پی مینا کا کہنا تھا کہ ’جب وہ سرائی کیل خان ٹریفک سگنل پر پہنچا تو کار قابو سے باہر ہوگئی اور رکشے سے جا ٹکرائی۔ اس کے بعد کار اچھلی اور فٹ پاتھ پر جانے والے تین راہ گیر بھی زخمی ہو گئے۔‘

انہوں نے کہا کہ مکینک نے کار کو سٹارٹ کرنے کی کوشش کی لیکن وہ ناکام رہا اور اسی دوران لوگ جمع ہونا شروع ہو گئے اور ٹریفک جام ہوگیا۔

ان کے مطابق کار سے شراب بھی برآمد ہوئی ہے۔

پولیس کا کہنا ہے کہ زخمی ہونے والے راہ گیروں کو قریبی ہسپتال پہنچایا گیا ہے۔