اندرون ملک سیاحت میں زبردست اضافے کی توقعات کہیں زیادہ ہیں۔ (فوٹو: سبق)
سعودی عرب کے وزیر سیاحت احمد الخطیب نے کہا ہے کہ سیاحتی ویزوں کا اجرا اگلے سال 2021 کے آغاز سے کیا جائے گا۔
سبق ویب سائٹ کے مطابق سعودی عرب نے حفاظتی تدابیر کے تحت کورونا وائرس پر قابو پانے کے لیے سیاحتی ویزوں کا اجرا معطل کر دیا تھا جسے آئندہ سال بحال کیا جائے گا۔
گرمیوں کی چھٹیوں کے دوران اندرون ملک سیاحت میں اضافہ ہوا۔ (فوٹو: الشرق الاوسط)
احمد الخطیب نے کہا ہے کہ سعودی عرب میں عالمی وبا پر کافی حد تک قابو پا لیا گیا ہے، اگر صورتحال میں اسی طرح بہتری ہوتی رہی تو امید ہے کہ آئندہ سال کے آغاز میں سیاحتی ویزے جاری کرنا شروع کر دیں گے۔
خبر رساں ادارے روئٹرز سے بات کرتے ہوئے سعودی وزیر سیاحت نے بتایا ہے کہ اگر اس اثنا میں کورونا وائرس کے پھیلاؤ کو روکنے یا خاتمے کی ویکسین آتی ہے تو یا کوئی مثبت پیش رفت ہوتی ہے تو ممکنہ طور پر رواں سال سے ہی ویزے جاری کیے جا سکتے ہیں۔
کورونا وائرس پر قابو پانے کے لیے سیاحتی ویزوں کا اجرا معطل ہے۔ (فوٹو: عرب نیوز)
الخطیب نے بتایا ہے کہ کورونا وائرس کے باعث سعودی عرب میں سیاحت کا شعبہ بہت متاثر ہوا ہے۔ رواں سال کے اختتام تک 35 تا 40 فیصد خسارے کا امکان ہے تاہم موسم گرما کی چھٹیوں کے دوران اندرون ملک سیاحت میں اضافہ ہوا ہے جس سے اس خسارے کو کم کرنے کی کوشش کی گئی ہے۔
واضح رہے کہ سعودی عرب نے ستمبر 2019 میں غیر ملکیوں کے لیے سیاحتی ویزوں کا اعلان کیا تھا جس کا مقصد 49 ممالک سے آنے والے سیاحوں کو سہولتیں فراہم کرنا ہے۔
ویکسین پر پیش رفت کے بعد رواں سال سے ہی ویزے جاری ہونا شروع ہو سکتے ہیں۔ (فوٹو:عرب نیوز)
لاک ڈاؤن کے بعد شہریوں اور مقیم غیر ملکیوں کی طرف سے بیرون ملک تعطیلات گزارنے کے بجائے اندرون ملک سیاحت میں زبردست اضافہ توقعات سے کہیں زیادہ تھا۔
