عمرہ اجازت نامہ حاصل کرنے کے لیے اعتمرنا ایپ لانچ

وزارت حج و عمرہ نے عمرہ اور زیارت کے علاوہ مسجد الحرام میں نماز ادا کرنے کے لیے اجازت نامہ حاصل کرنے کے لیے ’اعتمرنا‘ ایپ لانچ کر دی ہے۔

سعودی شہری و ملک میں مقیم غیر ملکی ایپ میں رجسٹریشن کر کے عمرہ اور زیارت کے لیے آج سے اجازت نامہ حاصل کرسکتے ہیں۔

سبق ویب سائٹ کے مطابق وزارت حج نے ابتدائی مرحلے میں اعتمرنا ایپ ایپل اسٹور میں لانچ کی ہے جہاں سے آئی فون صارفین اسے ڈاؤن لوڈ کر سکتے ہیں۔

جبکہ اگلے مرحلے میں یہ انڈروئیڈ موبائل کے صارفین کے لیے بھی دستیاب ہوگی۔

وزارت حج و عمرہ نے کہا ہے کہ ’اعتمرنا ایپ کے ذریعہ عمرہ، زیارت اور مسجد الحرام میں نماز کی ادائیگی کے لیے اجازت ناموں کے اجرا کے علاوہ صرف طواف کا اجازت نامہ، مسجد قبا، مسجد شہدائے احد اور جبل نور کی زیارت کے لیے بھی اجازت نامہ حاصل کیا جاسکتا ہے‘۔

واضح رہے کہ سعودی حکومت نے 4 اکتوبر سے عمرہ اور زیارت کو مرحلہ وار بحال کرنے کا فیصلہ کیا ہے۔

عمرہ، مسجد نبوی میں روضہ اطہر کی زیارت یا مسجد الحرام میں نماز کی ادائیگی کو منظم کرنے کے لیے خواہشمند کو پہلے اعتمرنا ایپ کے ذریعہ اجازت نامہ حاصل کرنا ہوگا۔

ابتدائی طور پر روزانہ کی بنیاد پر 6 ہزار افراد کو مختلف اوقات میں عمرہ کی سعادت حاصل کرنے کی اجازت دی جا ئے گی۔

 ہر گروپ میں ایک ہزار معتمرین کو موقع فراہم کیا جائے گا، مخصوص ایپ کے ذریعہ  یومیہ 6 گروپ  ترتیب دیے جائیں گے۔

بعد ازاں 18 اکتوبر سے عمرہ زائرین کی تعداد بڑھا کر15 ہزار کردی جائے گی۔

آئی فون صارفین ایپ ڈاؤن لوڈ کرنے کے لیے یہاں کلک کر سکتے ہیں۔