این سی بی کی تفتیش کے دوران دیپکا تین مرتبہ روئیں

بالی وڈ اداکار دیپکا پاڈوکون نارکوٹکس کنٹرول بیورو (این سی بی) کی جانب سے منشیات کیس کے حوالے سے تفتیش کے دوران تین مرتبہ رو پڑیں۔

انڈیا ٹوڈے کے مطابق گذشہ روز این سی بی نے دیپکا پاڈوکون سے پانچ گھنٹے سے زائد تفتیش کی تھی۔

اخبار کے مطابق تفتیش کے دوران دیپکا تین مرتبہ روئیں۔

 رپورٹ کے مطابق دیپکا نے مبینہ طور پر منیجر کرشمہ پراکاش سے ’منشیات‘ کے حوالے سے کی گئی واٹس ایپ چیٹ کا بھی اعتراف کیا لیکن انہوں نے منشیات کے استعمال کے تمام دعوؤں کی تردید کر دی۔

گزشتہ دنوں اداکارہ دیپکا اور ان کی منیجر کرشمہ پراکاش کی 2017 کی مبینہ واٹس ایپ چیٹ سوشل میڈیا پر وائرل ہوئی تھی جس میں مبینہ طور پر دیپکاپڈوکون ان سے منشیات منگوا رہی ہیں۔

اس چیٹ کے سامنے آنے کے بعد بھارتی تحقیقاتی ادارے نارکوٹکس کنٹرول بیورو نے دیپکا پاڈوکون، سارہ علی خان، شردھا کپور اور راکول پریت سنگھ کو تفتیش کے لیے طلب کیا تھا۔

خیال رہے کہ سشانت سنگھ راجپوت کی موت کے کیس میں منشیات کے معاملے پر اب تک سوشانت کی گرل فرینڈ ریا چکرورتی اور ان کے بھائی سمیت 12 افراد کو گرفتار کیا گیا ہے جس کے بعد بالی وڈ میں بھی تحقیقات کا دائرہ وسیع کیا گیا ہے۔

34 سالہ سوشانت 14 جون کو ممبئی میں اپنے فلیٹ میں مردہ حالت میں پائے گئے تھے۔ پولیس کے مطابق انھوں نے خودکشی کی تھی۔

تاہم بعد میں سوشانت کے خاندان نے ریا کے خلاف شکایت درج کرائی تھی اور انھیں خودکشی میں سہولت کاری سمیت دیگر جرائم میں ملوث قرار دیا تھا۔ ریا نے ان الزامات کی تردید کی ہے۔