بختاور کی منگنی: کیا بلاول بھٹو ورچوئل شرکت کریں گے؟

پاکستان پیپلز پارٹی کے چیئرمین بلاول بھٹو زرداری میں کورونا کی تشخیص کے باجود ان کی بہن بختاور بھٹو زرداری کی جمعہ کو ہونے والی منگنی کی تقریب ملتوی نہیں کی جا رہی تاہم مہمانوں کو مکمل احتیاطی تدابیر کے ساتھ شریک ہونے کی تاکید کی گئی ہے۔

بلاول ہاؤس کے ایک ترجمان عثمان غازی نے اردو نیوز کو بتایا کہ سابق صدر آصف زرداری اپنی بیٹی کی منگنی کی تقریب میں موجود ہوں گے جبکہ بلاول کی تقریب میں ورچوئل شرکت کا فیصلہ ابھی ہونا باقی ہے تاہم اس حوالے سے ملٹی میڈیا کا بندوبست کر لیا گیا ہے۔

یاد رہے کہ سابق وزیراعظم بے نظیر بھٹو کی صاحبزادی بختاور کی منگنی متحدہ عرب امارات میں مقیم لاہور کے کاروباری خاندان کے ممبر چوہدری محمود کے ساتھ  27 نومبر کو بلاول ہاؤس کراچی میں ہو رہی ہے۔

تقریب کے دعوت نامے قریب تین سو قریبی خاندانی اور سیاسی شخصیات کو جاری کیے گئے ہیں جن میں آنے والوں سے اپنے تازہ کورونا ٹیسٹ کی رپورٹ ہمراہ لانے کی درخواست کی گئی ہے۔

بلاول ہاؤس کے ترجمان کے مطابق چوہدری محمود کے خاندان کے افراد پہلے ہی بلاول ہاؤس پہنچ چکے ہیں۔

 کورونا وبا کے باعث تقریب کے لیے خصوصی حفاظتی اقدامات کیے گئے ہیں۔ مہمانوں کے لیے لازم ہوگا کہ وہ کورونا کی پی سی آر ٹیسٹ رپورٹ ہمراہ لائیں اور ماسک پہنیں جبکہ بیٹھنے کے انتظامات میں بھی سماجی فاصلے کے اصولوں کو مدنظر رکھا گیا ہے۔ تقریب کھلے آسمان تلے لان میں ہو گی اور وہیں مہمانوں کو رات کا کھانا پیش کیا جائے گا۔

ان کے مطابق بلاول ہاؤس کے تمام سٹاف کا بھی کورونا ٹیسٹ کر لیا کیا گیا ہے جبکہ کیٹرنگ کمیٹی کے تعینات اسٹاف کا بھی کورونا ٹیسٹ ہو گا۔ ان سے پوچھا گیا کہ کورونا ٹیسٹ مثبت آنے کے بعد بلاول بھٹو کی تقریب میں شرکت کا کیا طریقہ کار ہو گا تو ان کا کہنا تھا کہ خاندان کے افراد اس حوالے سے جلد فیصلہ کر لیں گے، تاہم چیئرمین پیپلز پارٹی کی ورچوئل شرکت کا بندوبست بھی موجود ہے۔

ایک اور سوال پر ان کا کہنا تھا کہ بلاول بھٹو زرادی کی کورونا رپورٹ مثبت آ گئی ہے تاہم ان کی طبعیت ٹھیک ہے اور علامات معمولی نوعیت کی ہیں۔

بلاول بھٹو نے بھی جمعرات کو اپنی ٹویٹ میں لکھا تھا کہ ’میرا کورونا وائرس کا ٹیسٹ مثبت آیا ہے اور میں نے معمولی علامات کے ساتھ خود کو قرنطینہ کر لیا ہے۔ میں گھر سے کام جاری رکھوں گا اور پیپلز پارٹی کے فاؤنڈیشن ڈے کی تقریب میں ویڈیو لنک کے ذریعے شرکت کروں گا۔‘