لندن کے نیلام گھر میں مشرق وسطی سے متعلق نادر پینٹنگز

برطانوی دارالحکومت لندن کے نیلام گھر سوثھبی نے مشرق وسطی سے متعلق کتابوں، نقشوں اور پینٹنگز کا نادر انتخاب پیش کیا ہے۔

 ان میں سب سے اہم مسجد الحرام مکہ مکرمہ اور مسجد نبوی مدینہ منورہ کی پینورامائی پینٹنگز ہیں۔ ان کا تعلق 18 ویں اور 19 ویں صدی عیسوی سے ہے۔

اخبار 24 کے مطابق نیلامی میں مکہ مکرمہ اور مدینہ منورہ کی انڈین پینٹنگز، سفر ناموں، قلمی نسخوں اور کتابوں کی بھی نیلامی کی گئی ہے۔ 

نیلام گھر کے ماہر رچرڈ ویٹورینی نے نیلامی میں شامل نادر اشیا کے انتخاب کے حوالے سے کہا کہ  مسجد الحرام مکہ مکرمہ اور مسجد نبوی مدینہ منورہ کی پینٹنگز سب سے اہم ہیں۔

انہیں حاصل کرنے کے  لیے حیرت انگیز مسابقت ہورہی ہے۔ یہ دونوں پینٹنگز سفید اور سیاہ فریم میں انڈین انداز پر ڈیزائن کی گئی ہیں اور ان کا حاشیہ سبز رنگ کا ہے۔