سنیچر کو کئی علاقے گرد آلود ہواوں کی زد میں، گرمی بڑھے گی

سعودی موسمیات کے قومی مرکز نے سنیچر بارہ جون کو موسمی تبدیلیوں کے حوالے سے پیشگوئی جاری کی ہے۔

اخبار 24 کے مطابق قومی مرکز کا کہنا ہے کہ سنیچر کو گرد آلود تیز ہوائیں چلنے کا امکان ہے جن سے مشرقی ریجن میں دن کے وقت حد نظر انتہائی حد تک محدود ہوجائے گی۔ ہواؤں کی رفتار 50 کلو میٹر فی گھنٹہ ہوگی۔

قومی مرکز کا کہنا ہے کہ گرد آلود ہواؤں سے ریاض اور القصیم ریجن بھی متاثر ہوں گے جبکہ حائل، حدود شمالیہ، مدینہ  منورہ اور مکہ مکرمہ کے محدود مقامات گرد آلود ہواؤں کی زد میں ہوں گے۔  

تبوک کے ساحلی مقامات پر بھی گرد آلود ہوائیں چلیں گی البتہ جازان، عسیر اور باحہ کے بالائی مقامات پر گرج چمک کے ساتھ بارش کا سلسلہ جاری رہے گا۔  

بیان میں کہا گیا کہ مکہ مکرمہ کے پہاڑی علاقوں پر بھی بارش کا امکان ہے۔

قومی مرکز کا کہنا ہے کہ سنیچر کو تبوک اور مدینہ منورہ کے ساحلی مقامات اور مغربی علاقوں میں شدید گرمی پڑے گی۔ مکہ مکرمہ ریجن میں شمالی علاقے اور ساحلی مقامات پر بھی زبردست گرمی ہوگی۔ 

قومی مرکز کا کہنا  ہے کہ سب سے زیادہ درجہ حرارت 48 سینٹی گریڈ مکہ مکرمہ اور سب سے کم درجہ حرارت 16 سینٹی گریڈ السودۃ میں ہوگا۔