ریاض، جدہ ریلوے لائن اور نئی قومی فضائی کمپنی کا پروگرام

سعودی وزیر نقل و حمل و لاجسٹک خدمات انجینیئر صالح الجاسر  نے کہا ہے کہ مملکت میں کئی اہم ٹرانسپورٹ منصوبے نافذ کیے جائیں گے-  

 مجوزہ منصوبوں میں جدہ اور ریاض کے درمیان ریلوے لائن، مشرقی علاقے کو مغربی  سے جوڑنے والی ریلوے لائن اور نئی قومی فضائی کمپنی کا قیام قابل ذکر ہے- 

عکاظ اخبار کے مطابق الجاسر نے کہا کہ نئی حکمت عملی کے تحت متعدد بین الاقوامی فضائی گروپ بنائے جائیں گے- لاجسٹک زونز اور پلیٹ فارم قائم کیے جائیں گے- علاوہ ازیں سعودی بندرگاہوں کا بنیادی ڈھانچہ جدید خطوط پر استوار کیا جائے گا- پورے ملک میں سڑکوں کے جال کا معیار زیادہ عمدہ بنایا جائے گا- 

الشرق الاوسط کے مطابق سعودی عرب فضائی نقل و حمل میں دنیا بھر میں پانچویں پوزیشن حاصل کرنے کی حکمت عملی تیار کررہا ہے- ڈھائی سو سے زیادہ بین الاقوامی ہوائی اڈوں کے لیے پروازیں چلائی جائیں گی- کارگو سیکٹر کو جدید تر اور وسیع تر بنایا جائے گا- 4.5 ملین ٹن سے زیادہ سامان ہوائی جہازوں سے منتقل کیا جائے گا- 

جدہ ایوان تجارت میں امدادی خدمات اور فضائی کمیٹی کے چیئرمین ڈاکٹر حسین الزہرانی نے بتایا کہ بڑی بندرگاہوں اور ایئرکارگو کو ایک دوسرے سے مربوط کیا جائے گا-

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں