کورونا میں اضافہ، ٹوکیو اولمپکس میں تماشائیوں کی شرکت پر پابندی عائد

جاپان میں منتظمین نے ٹوکیو اولمپکس میں تماشائیوں کی شرکت پر پابندی عائد کردی ہے۔

فرانسیسی خبر رساں ایجنسی اے ایف پی کے مطابق منتظمین نے جمعرات کو کہا کہ ’اب ٹوکیو اولمپکس تماشائیوں کے بغیر منعقد ہوں گے۔‘

’یہ فیصلہ کورونا وائرس کی شدت میں اضافے کے بعد جاپان کی جانب سے دارالحکومت میں ہنگامی حالت کے نفاذ کے تناظر میں کیا گیا ہے جو پورے ایونٹ کے دوران برقرار رہے گی۔‘

اگرچہ اس بات کی بہت زیادہ توقع بھی کی جارہی تھی، تاہم چند ہفتے قبل تک منتظمین کا کہنا تھا کہ ’ان کا مقصد تماشائیوں کی محدود تعداد کے ساتھ بین الاقوامی ایونٹ منعقد کرنا ہے۔‘

ٹوکیو 2020 کے صدر سیکو ہاشی موتو نے سرکاری حکام، ٹوکیو، اولمپکس اور پیرالمپکس کے نمائندوں کے مابین بات چیت کے بعد کہا کہ ’یہ افسوسناک ہے کہ ہم کھیلوں کو انتہائی محدود سطح پر پیش کر رہے ہیں، جس میں ہمیں کورونا وائرس کے پھیلاؤ کا سامنا ہے۔‘

ان کا کہنا تھا کہ ’میں مقامی علاقوں میں رہنے والے اور ان تماشائیوں کے لیے افسوس کا اظہار کرتا ہوں جنہوں نے اولمپکس کے لیے ٹکٹ خرید رکھے تھے۔‘

ٹوکیو اولمپکس کی اورگنائزنگ کمیٹی کی سربراہ سیکو ہاشی موتو کا کہنا ہے کہ ’یہ فیصلہ آسان نہیں تھا۔‘

جاپان سمیت دنیا بھر میں کورونا وائرس کے پھیلاؤ سے منتظمین کی جانب سے ایونٹ کو بھرپور انداز میں منعقد کرنے کی کوششوں کو دھچکا لگا۔

اس سے قبل مارچ میں کورونا وائرس سے تاخیر کا شکار ہونے والے ٹوکیو اولمپکس کے لیے غیر ملکی تماشائیوں کی شرکت پر پابندی عائد کر دی گئی تھی۔

اولمپکس کے منتظمین کی جانب سے اس فیصلے کا اعلان کرتے ہوئے اسے مایوس کن مگر ’ناگزیر‘ قرار دیا گیا تھا۔

یاد رہے کہ دنیا بھر میں کورونا وائرس کے پھیلاؤ کی وجہ سے مارچ 2020 میں ٹوکیو میں ہونے والے اولمپکس کو موخر کر دیا گیا تھا۔

یہ گیمز 24 جولائی سے 9 اگست 2020 تک منعقد ہونا تھیں تاہم اب یہ نئے شیڈول کے مطابق 23 جولائی سے 8 اگست 2021 تک منعقد ہوں گی۔