ٹوکیو اولمپکس کا انعقاد ممکن ہو پائے گا؟

جاپان کے اولمپک وزیر سیکو ہاشی موتو نے منگل کو کہا ہے کہ اولمپکس 2020 اگلے سال کسی بھی قیمت پر ہونے چاہییں تاکہ کھلاڑیوں کی محنت رائیگاں نہ جائے۔

انٹرنیشنل اولمپک کمیٹی کے نائب صدر اور آئی او سی کوآرڈینیشن کمیشن کے سربراہ جان کوٹس نے آئی او سی اجلاس کے ایک دن بعد فرانسیسی خبر رساں ایجنسی اے ایف پی کو بتایا کہ کورونا وائرس کی صورت حال سے قطع نظر آئندہ سال 2021 میں ٹوکیو اولمپکس کا انعقاد کیا جائے گا۔

جاپان کے اولمپک وزیر سیکو ہاشی موتو نے انٹرنیشنل اولمپک کمیٹی کے نائب صدر جان کوٹس کے تبصرے کے بارے میں پوچھے جانے پر کہا کہ اگلے سال کھیلوں کے لیے کھلاڑی اس صورت حال میں بھی سخت محنت کر رہے ہیں، لٰہذا مجھے لگتا ہے کہ ہمیں انہیں (اولمپکس کو) کسی بھی قیمت پر کروانا ہو گا۔

ان کا کہنا تھا کہ ’مجھے لگتا ہے کہ مسٹر کوٹس کو یقین دلایا گیا ہے کہ باہمی کوششوں سے  ٹوکیو اولمپکس کا انعقاد کیا جاسکتا ہے۔‘

 آئی او سی کے کوآرڈینیشن کمیشن کے سربراہ جان کوٹس نے کہا کہ کورونا ہو یا نہیں تاہم اولمپکس اگلے سال 23 جولائی کو شروع ہوں گے۔

ٹوکیو اولمپکس 2020 کے منتظمین کے ترجمان نے براہ راست جان کوٹس کی بات پر تبصرہ کرنے سے انکار کیا ہے کہ وہ جان کوٹس کی بات کی حمایت کرتے ہیں یا انکار کرتے ہیں۔

یاد رہے کہ دنیا بھر میں کورونا وائرس کے پھیلاؤ کی وجہ سے رواں برس مارچ میں ٹوکیو میں ہونے والے اولمپکس کو موخر کر دیا گیا تھا۔ یہ گیمز 24 جولائی سے 9 اگست 2020 تک منعقد ہونا تھیں تاہم اب یہ نئے شیڈول کے مطابق 23 جولائی سے 8 اگست 2021 تک منعقد ہونی ہیں۔

دوسری جانب جاپان کی سرحدیں آنے والے غیر ملکیوں کے لیے بند ہیں جبکہ حکام نے واضح کیا ہے کہ ایونٹ کے لیے دوبارہ تاخیر ممکن نہیں ہے اور ایسے اشارے مل رہے ہیں کہ جاپان میں اس حوالے سے عوامی جوش و خروش کم ہوتا جا رہا ہے۔

اس سے قبل مختلف مواقع پر اولمپکس کا بائیکاٹ کیا گیا اور یہ گیمز دہشت گرد حملوں اور مظاہروں کا بھی نشانہ بنیں لیکن ان واقعات کے باوجود 1982 سے اب تک مسلسل ہر چار سال بعد اولپمکس گیمز منعقد ہوتی رہی ہیں۔ کورونا وائرس کے باعث ملتوی ہونے والا یہ کھیلوں کا سب سے بڑا ایونٹ ہے۔