پاکستان میں سعودی سفیر سے وزیراعلٰی، گورنر اور سپیکر پنجاب اسمبلی کی ملاقات

پاکستان کے صوبہ پنجاب کے گورنر چودھری سرور اور وزیراعلیٰ  سردار عثمان احمد خان بزدار نے پاکستان میں سعودی عرب کے سفیر نواف المالکی سے ملاقات کی ہے۔ سعودی سفیر نے سپیکر پنجاب اسمبلی چودھری پرویز الٰہی سے بھی ملاقات کی ہے۔
سعودی سفارت خانے سے جاری کردہ پیغام کے مطابق بدھ کو لاہور میں ہونے والی ملاقات کے دوران دونوں برادر ممالک کے درمیان باہمی دلچسپی کے موضوعات اور دو طرفہ تعلقات کو مزید مستحکم کرنے پر تبادلہ خیال کیا گیا۔
وزیراعلیٰ پنجاب عثمان بزدار کے دفتر سے جاری کردہ بیان کے مطابق ملاقات میں باہمی تعلقات کے فروغ اور مختلف شعبوں میں تعاون بڑھانے پرتبادلہ خیال کیا گیا جبکہ دبئی ایکسپو میں باہمی تجارت کے فروغ کے لیے ایم او یو سائن کرنے پر اتفاق ہوا۔ 

وزیراعلیٰ عثمان بزدار نے کہا کہ پنجاب میں بزنس کوفرینڈلی اور رسک فری بنا رہے ہیں جبکہ سرمایہ کاروں کے لیے سی ایم آفس میں خصوصی ڈیسک بنا رہے ہیں۔
وزیراعلیٰ عثمان بزدار نے کہا کہ سعودی عرب نے ہر مشکل گھڑی میں پاکستان کی معاونت کر کے تعلق نبھایا- پاکستان او رسعودی عرب کے عوام اسلامی اخوت کے رشتے میں بندھے ہیں۔ 
ان کا کہنا تھا کہ پاکستان کی تعمیر وترقی میں سعودی حکومت کے تعاون کو قدر کی نگاہ سے دیکھتے ہیں-

اس موقع پر چیئرمین پی بی آئی ٹی اوردیگر حکام بھی موجود تھے۔

سعودی سفیر نواف بن سعید المالکی نے بدھ کو سپیکر پنجاب اسمبلی چودھری پرویز الٰہی سے بھی ملاقات کی۔ چودھری پرویز الٰہی نے سعودی سفیر کا استقبال کیا، ملاقات کے دوران دونوں برادر ممالک کے درمیان باہمی دلچسپی کے موضوعات پر تبادلہ خیال کیا گیا۔