نیلے کپڑوں میں ملبوس ’راکٹ مین‘ شمالی کورین فوجیوں کے درمیان کیا کر رہا ہے؟

شمالی کوریا کے ایک فوجی کی تنگ نیلے کپڑوں میں سرکاری میڈیا پر ایک تصویر سامنے آئی ہے جس نے کافی ہلچل مچائی ہے۔

تصویر کے سامنے آتے ہی کسی نے فوجی کو ’سپر ہیرو‘ ’کیپٹن ڈی پی آر کے‘ اور کسی نے ان کو ’راکٹ مین‘ کہا۔

امریکی خبر رساں ادارے اے پی کے مطابق وہ پیر کو ان 30 فوجیوں کے ساتھ موجود تھے جنہوں نے شمالی کوریا کے رہنما کم جونگ ان کے ساتھ اسلحے کی ایک نمائش میں تصویر لی۔

شمالی کوریا نے نمائش کے اگلے دن تصایر شائع کی تھیں۔

تمام فوجیوں نے مخصوص رنگ یونیفارم پہنا تھا، ان میں صرف دو افراد نے مختلف رنگ پہنا ہوا تھا، ایک نے نیلا رنگ اور دوسرے نے نیوی بلیو یونیفارم پہنا تھا۔

شمالی کوریا کے رہنما نے سیاہ رنگ پہنا ہوا تھا۔

جنوبی کوریا، امریکہ اور دیگر جگہوں پر کچھ ٹوئٹر صارفین نے ان کو مذاق کا نشانہ بنایا اور کہا کہ وہ ’انسانی توپ کے گولے‘ جیسا دکھ رہے ہیں۔

شمالی کوریا کی سرکاری میڈیا نے اس شخص کے بارے میں کچھ نہیں کہا تاہم مونٹیری میں مڈل بری انسٹی ٹیوں آف انٹرنیشنل سٹڈیز کے ایک تجزیہ کار جیفری لیوئس نےایک تصویر ٹیوٹ کی کہ ’ایسا لگ رہا ہے کہ وہ پیرا شوٹر تھا۔‘

شمالی کوریا کے دیگر تصاویر میں دیکھا جا سکتا ہے کہ کم جونگ ان نمائش سے قبل ایک ایئر شو کے دوران جنگی طیاروں کو اڑتے دیکھ رہے ہیں۔

کوریا کی سرکاری خبر رساں ادارے نے کہا ہے کہ نمائش شروع ہونے سے قبل اعلیٰ درجے کے ایک پیرا شوٹسٹ نے پارٹی کے جھنڈے کو لہراتے ہوئے کرتب دکھائے۔

شمالی کوریا میں ہونے والے پہلے ایئر شو کی تصاویر میں بھی دیکھا جا سکتا ہے کہ پیرا شوٹرز نے نیلے رنگ کے تنگ کپڑے پہنے ہوئے تھے۔