’روہت شرما کریز پر ترانے کے دورانیے سے بھی کم وقت رہے‘

پاکستان اور انڈیا کے درمیان دبئی میں ہونے والے میچ کے دوران شائقین کرکٹ کے درمیان سوشل میڈیا پر کافی نوک جھونک جاری ہے۔

پاکستانی ٹوئٹر پر انڈین بیٹسمین روہت شرما ٹرینڈ کر رہے ہیں اور صارفین ان پر فقرے کس رہے ہیں۔ روہت شرما کو شاہین آفریدی نے اپنے پہلے ہی اوور میں صفر پر آؤٹ کر دیا تھا۔

ٹوئٹر ہینڈل افغان جلیبی نے لکھا کہ ’روہت شرما کریز پر قومی ترانے کی دورانیے سے بھی کم وقت رہے۔‘

کچھ لوگ ٹویٹر پر میمز بھی پوسٹ کرتے رہے۔

ٹویٹر صارف انس ٹیپو نے لکھا ’ اس وقت کو یاد کرو جب روہت شرما نے شاہین آفریدی کو متوسط درجے کا باؤلر کہا تھا۔‘

آپ کو یاد ہوگا ایک بار روہت شرما نے ایک رپورٹر کے سوال پر کہا تھا کہ اگر وہ پاکستانی ٹیم کے کوچ بنے تو پاکستانی ٹیم کو بتائیں گے کہ کرکٹ کھیلتے کیسے ہیں۔

ایک پاکستانی صارف نے اس بیان پر تنقید کرتے ہوئے کہا کہ ’کوچ  بن جانے کے بعد یہ ہمیں بتائے گا کہ پہلی بال پہ کیسے آؤٹ ہوتے ہیں۔‘

واجد شاہ نامی صارف نے روہت شرما پر طنز کرتے ہوئے کہا کہ ’روہت شرما نے اپنی سینچری 100 رنز سے مس کردی۔‘