آسٹریلوی کرکٹ ٹیم 24 سال بعد پاکستان کا دورہ کرے گی، شیڈول جاری

پاکستان کرکٹ بورڈ نے آسٹریلیا کے ساتھ ہوم سیریز کا شیڈول جاری کر دیا ہے۔ 

آسٹریلیا آئندہ سال مارچ اور اپریل میں 24 سال بعد پاکستان کی سرزمین پر دوطرفہ سیریز کھیلے گا۔

پی سی بی کی جانب سے جاری کیے گئے شیڈول کے مطابق پاکستان اور آسٹریلیا کے درمیان سیریز میں 3 ٹیسٹ میچز، 3 ایک روزہ اور ایک ٹی 20  میچ کھیلا جائے گا۔

پاکستان اور آسٹریلیا کے درمیان ٹیسٹ سیریز کا آغاز تین مارچ سے نیشنل کرکٹ سٹیڈیم کراچی میں ہوگا۔

سیریز میں دوسرا ٹیسٹ میچ 12 مارچ سے پنڈی کرکٹ سٹیڈیم راولپنڈی میں کھیلا جائے گا جبکہ ٹیسٹ سیریز کے آخری میچ کی میزبانی قدافی سٹیڈیم لاہور 21 مارچ سے کرے گا۔ 

آسٹریلیا کے ساتھ ون ڈے اور ٹی 20 سیریز کے تمام میچز قدافی سٹیڈیم لاہور میں کھیلے جائیں گے۔

پہلا ون ڈے انٹرنیشنل 29 مارچ، دوسرا 31 مارچ جبکہ سیریز کا تیسرا اور آخری ون ڈے انٹرنیشنل دو اپریل کو کھیلا جائے گا۔ سیریز میں شامل واحد ٹی 20 میچ پانچ اپریل کو قدافی سٹیڈیم لاہور میں کھیلا جائے گا۔ 

کرکٹ آسٹریلیا کا وفد دسمبر میں پاکستان کا دورہ کرے گا

پی سی بی کے اعلامیے کے مطابق ’کرکٹ آسٹریلیا کے چیف ایگزیکٹو نک ہوکلے نے کہا کہ وہ اس دورے کے انعقاد کو یقینی بنانے کے لیے پی سی بی کی کاوشوں کو سراہتے ہیں اور وہ اس سیریز کے لیے لاجسٹک، سکیورٹی اور کوویڈ 19 پروٹوکولز سے متعلق آئندہ چند ماہ پی سی بی سےمسلسل رابطے میں رہیں گے۔‘

اس تناظر میں کرکٹ آسٹریلیا کا وفد دسمبر میں پاکستان کا دورہ کرے گا۔ دورے کے دوران وہ پی سی بی آفیشلز اور  صوبائی اور وفاقی حکام سے ملاقاتیں کرکے معاملات کو حتمی شکل دیں گے۔

پاکستان کرکٹ بورڈ کی جانب سے جاری اعلامیہ کے مطابق چیئرمین پی سی بی رمیز راجہ نے آسٹریلیا  کی ٹیم کا دورہ پاکستان پر خوشی کا اظہار کرتے ہوئے کہا کہ ’انہیں تین ٹیسٹ میچز کی سیریز کے انعقاد پر ذاتی طور پر بہت خوشی ہے، آسٹریلیا ایک مضبوط ٹیم ہے اور ان کا 24 سال بعد پاکستان آکر کرکٹ کھیلنا یہاں موجود فینز کے لیے بہترین لمحہ ہوگا۔‘ 

چیئرمین پی سی بی کے مطابق ’یہ آسٹریلوی کرکٹرز کے لیے بھی ایک شاندار موقع ہوگا کہ وہ پاکستان کے تاریخی گراؤنڈز میں کرکٹ کھیل کر یہاں کی عوام کی مہمان نوازی کا شرف حاصل کرسکتے ہیں۔‘

کرکٹ آسٹریلیا کے چیف ایگزیکٹو نک ہوکلے نے کہا کہ پاکستان کی ٹیم بہت باصلاحیت کھلاڑیوں پر مشتمل ہے اور اس کی مثال متحدہ عرب امارات میں جاری ٹی 20 ورلڈ کپ میں ان کی حالیہ کارکردگی ہے اور پاکستان کی عوام کرکٹ سے پیار کرتی ہے اور ہماری آئندہ سال وہاں روانگی وہاں موجود کرکٹ فینز کو مزید پرجوش کرے گی۔‘

آسٹریلیا نے آخری مرتبہ 1998 میں پاکستان کا دورہ کیا۔ اس دوران مارک ٹیلر کی قیادت میں مہمان ٹیم نے سیریز ایک صفر سے اپنے نام کی تھی۔ آسٹریلیا نے پہلی مرتبہ 1959 میں رچی بینوا کی قیادت میں پاکستان کا دورہ کیا تھا۔