کیا شاہد آفریدی پی ایس ایل 7 میں کوئٹہ کی نمائندگی کریں گے؟

پاکستان سپر لیگ کا ساتواں ایڈیشن جنوری 2022 میں شروع ہوگا اور اب تک اس میگا ایونٹ کی ڈرافٹنگ بھی نہیں ہوئی ہے لیکن سوشل میڈیا پر خبریں گردش کررہی ہیں کہ پاکستان کے سابق کپتان شاہد آفریدی اس بار کوئٹہ گلیڈیٹرز کی نمائندگی کریں گے۔

ٹویٹر پر عرفہ فیروز نامی صارف نے لکھا کہ ’شاہد آفریدی پاکستان سپر لیگ کے ساتویں ایڈیشن میں کوئٹہ گلیڈیٹرز کی نمایندگی کریں گے اور سرفراز احمد کو اس ٹیم کا کپتان برقرار رکھا گیا ہے۔‘

اس خبر کی کوئٹہ گلیڈیٹرز کی جانب سے تصدیق یا تردید نہیں کی گئی ہے۔ تاہم کوئٹہ گلیڈیٹرز کے مالک ندیم عمر کچھ ماہ قبل یہ کہہ چکے ہیں کہ وہ امید کرتے ہیں کہ شاہد آفریدی پی ایس ایل 7 میں ان کی ٹیم کا حصہ ہوں گے۔

انہوں نے اپنے ایک انٹرویو میں کہا تھا کہ ’اگر ایسا ہوتا ہے تو ہمیں بہت خوشی ہوگی۔‘

اس سے قبل شاہد آفریدی بھی میڈیا کے ساتھ گفتگو میں یہ کہہ چکے ہیں کہ 'ہوسکتا ہے یہ ان کا بحیثیت کھلاڑی آخری ٹورنامنٹ ہو اور ان کی خواہش ہے کہ وہ اس بار کوئٹہ گلیڈیٹرز کی نمائندگی کریں۔'

پاکستان کے اخبار ’ایکسپریس نیوز‘ کے مطابق قومی کرکٹ ٹیم کے سابق کپتان نے انہیں یقین دہانی کرائی ہے کہ وہ پاکستان سپر لیگ کے اگلے ایڈیشن میں ان کی ٹیم کی نمائندگی کریں گے۔

شاہد آفریدی نے پچھلے پی ایس ایل میں ملتان سلطان کی نمائندگی کی تھی اور ٹیم کے مینجر حیدر اظہر نے اس خبر کی تردید کر دی ہے۔

اپنی ایک ٹویٹ میں ان کا کہنا تھا کہ ’باس نہ کیٹیگریز بنی ہیں، نہ پلیئرز کی لسٹیں نکلی ہیں، نہ ٹریڈ ونڈو کھلی ہے اور نہ ہی ریٹینشن کی تاریخیں مقرر ہوئی ہیں۔‘

انہوں نے صارفین سے درخواست کی کہ وہ کھلاڑیوں اور ان کی ٹیموں کا احترام کریں۔