’الیکٹرانک بل‘ سے تجارتی پردہ پوشی کا خاتمہ کس طرح؟

 مملکت بھر میں سعودی شہری اور مقیم غیرملکی 4 دسمبر2021 کا انتظار کر رہے ہیں- یہ وہ تاریخ ہے جب الیکٹرانک بل کا پہلا مرحلہ شروع ہو گا-

 اس حوالے  سے زکوٰۃ، ٹیکس اور کسٹم اتھارٹی پورے ملک میں آگہی مہم چلا رہی ہے- کہا جارہا ہے کہ یہ کثیر المقاصد پروگرام ہے- اس کا ایک بڑا مقصد سعودیوں کے نام سے غیرملکیوں کے کاروبار کا پتہ لگانا بھی ہے-

کئی لوگ یہ دریافت کرنے لگے ہیں کہ آخر الیکٹرانک بل سعودیوں کے  نام سے غیرملکیوں کے کاروبار کا پتہ لگانے میں کس طرح معاون ثابت ہو سکتے ہیں- 

زکوۃ، ٹیکس اور کسٹم اتھارٹی کے تعاون سے رابطہ مرکز ’متمم‘ نے الیکٹرانک بل سے متعلق اٹھنے والے سوالات کے جوابات کا سلسلہ شروع کیا ہے-

اتھارٹی کے ڈپٹی گورنر عبداللہ الفنتوخ نے کہا ہے کہ الیکٹرانک  بل قومی پروگرام ہے- یہ سعودیوں کے نام سے غیرملکیوں کے کاروبار کے خاتمے  میں معاون بنے گا-

بل کی بدولت دکانداروں کے درمیان منصفانہ مسابقت کے ماحول کو تقویت ملے گی- یہ پروجیکٹ سب کی مدد سے ہی کامیاب ہو سکے گا- 

الفنتوخ نے بتایا کہ الیکٹرانک بل پروجیکٹ دو مراحل  میں نافذ کیا جارہا ہے- پہلے مرحلے میں الیکٹرانک بل کے اجرا اور اسے الیکٹرانک سسٹم میں محفوظ کرنے پر زور دیا جائے گا-

دوسرے مرحلے میں الیکٹرانک بل مفصل شکل میں جاری ہوگا اور اسے سسٹم سے مربوط کیا جائے گا- 

سعودیوں کے نام سے غیرملکیوں کے کاروبار کے انسداد کے قومی پروگرام کے ایگزیکٹیو چیئرمین احمد السویلم نے کہا کہ تجارتی پردہ پوشی معیشت کو نقصان پہنچا رہی ہے- الیکٹرانک بل اسے قابو کرے گا- 

السویلم کا مزید کہنا تھاکہ الیکٹرانک بل کے دوسرے مرحلے میں سودے سے متعلق تمام گوشوارے جمع کیے جائیں گے- اس سے تجارتی پردہ پوشی کے بارے میں پائے جانے والے شکوک و شبہات کی تصدیق ہوسکے گی- 

السویلم نے کہا کہ الیکٹرانک بل کا ایک فائدہ یہ ہوگا کہ اجارہ داری کا خاتمہ ہوگا- مشکوک اداروں کے ساتھ کاروبار کرنے والا نیٹ ورک  کا بھی پتا لگے گا- 

ایک کامیاب سرمایہ کار فارس الترکی کا کہنا تھا کہ  الیکٹرانک بل کا فائدہ کاروباری اداروں کے مالکان کو پہنچے گا-

اس کے بڑے فوائد ہوں گے- ٹیکس، اقرار ناموں کی شرح بڑھے گی- بجٹ منظم ہوگا- بڑے  تاجروں کے کاروبار پر اس کے خوشگوار اثرات مرتب ہوں گے-