تیل کی طلب کے حوالے سے او میکرون کا اثر ابھی واضح نہیں: سعودی وزیر توانائی

سعودی وزیر توانائی شہزادہ عبدالعزیز بن سلمان نے کہا ہے کہ’ اوپیک پلس کی  ٹیکنیکل کمیٹی کے اجلاس تیل مارکیٹ پر نئے کورونا وائرس اومیکرون کے اثرات کا جائزہ مکمل کرنے کی وجہ سے ملتوی کیے گئے ہیں‘۔  

الوطن اخبار کے مطابق الجافورہ فیلڈ کو جدید خطوط پر استوارکے افتتاح کے بعد صحافیوں سے گفتگو کرتے ہوئے انہوں نے کہا کہ’ اومیکرون وائرس پر کوئی تشویش نہیں‘۔  

سعودی وزیر توانائی کا کہنا تھا کہ’ اوپیک پلس کے سربراہ کی حیثیت سے شریک سربراہ کے ساتھ مشاورت کر کے ٹیکنیکل کمیٹی کے اجلاس بدھ تک کےلیے ملتوی کیے ہیں‘۔

اوپیک پلس میں شامل ممالک کے وزرائے پٹرولیم کا اجلاس جمعرات کو ہوگا۔ اس دوران تیل مارکیٹ کی صورتحال کا جائزہ لینے کا مزید وقت مل جائے گا۔

انہوں نے کہا کہ ’عالمی ادارے صحت نے نئے وائرس کے حوالے سے جو انتباہ جاری کیا ہے وہ مبالغہ آمیز ہے‘۔

سعودی وزیر توانائی کا کہنا تھا کہ’ محدود وقت کےلیےاجلاس ملتوی کیے ہیں، اس سے حالات کو زیادہ بہتر شکل میں جاننے سمجھنے کا مزید موقع ملے گا‘۔

عرب نیوز کے مطابق شہزادہ عبدالعزیز بن سلمان نے کہا ہے کہ’ تیل کی طلب کے حوالے سے کورونا کی نئی شکل او میکرون کا اثر ابھی واضح نہیں ہے‘۔