حمزہ، مریم یا جنید، زیادہ سُریلا کون؟

مسلم لیگ ن کی نائب صدر مریم نواز اور پنجاب میں اپوزیشن لیڈر حمزہ شہباز شریف نے جنید صفدر کی شادی کے سلسلے میں منعقدہ ایک تقریب میں گلوکاری کا مظاہرہ کیا تو حکومتی شخصیات بھی ان کی تعریف کیے بغیر نہ رہ سکیں۔

منگل کے روز وزیراطلاعات فواد چوہدری نے وفاقی کابینہ کے اجلاس کے بعد بریفنگ دی تو اس دوران انہوں نے کہا کہ مریم نواز اور حمزہ شہباز کا گانا اچھا لگا۔

فواد چوہدری کا کہنا تھا کہ ’میں حمزہ اور مریم کو سراہتا ہوں، ہماری جو نجی محفلیں ہوتی ہیں، خاندان بیٹھتا ہے تو اس میں گانے بھی گائے جاتے ہیں۔ مہندی ہے، شادی ہے انہوں نے گایا یہ اچھا لگا۔ نارمل پاکستان ایسا ہی ہے، اس میں کیا اعتراض ہے۔‘

ان کا مزید کہنا تھا کہ ’یہ پرفیکٹلی اوکے ہے۔ ہمارا ان سے سیاسی اختلاف ہے۔‘

فواد چوہدری سے پہلے وزیراعلی پنجاب کے ترجمان اظہر مشوانی بھی مریم نواز کے گنگنانے کی ایک ویڈیو شیئر کرتے ہوئے یہ کہہ چکے تھے کہ ’شریف خاندان ویڈیو اینڈ ساؤنڈ پروڈکشن میں بہت ترقی کر سکتا ہے۔‘

گزشتہ روز سے مریم نواز کے بیٹے جنیدصفدر کی شادی کے حوالے سے ایک تقریب کی مختلف ویڈیوز اور تصاویر سوشل ٹائم لائنز پر زیر گردش ہیں۔

ان مختصر ویڈیوز میں کہیں مریم نواز تو کہیں ان کے چچا زاد بھائی حمزہ شہباز شریف گنگناتے دکھائی دیتے ہیں۔

اسی دوران مریم نواز کی جانب سے ’بیٹے کی شادی کو نجی، خاندانی معاملہ‘ قرار دیتے ہوئے کہا گیا کہ ’تمام ماؤں کی طرح میں بھی سیاسی تبصروں کے بغیر اس موقع سے محظوظ ہونے کا حق رکھتی ہوں۔‘

مریم نواز نے ٹوئٹر پر جاری کردہ اپنے پیغام میں مزید لکھا کہ ’میں میڈیا اور دیگر سے التماس کرتی ہوں کہ خاندان کی پرائیویسی کا احترام کیا جائے۔‘

حکومتی شخصیات کی جانب سے مسلم لیگ ن کے رہنماؤں کی گلوکاری کی تعریف اور مریم نواز کی جانب سے پرائیویسی کے احترام کا تقاضہ ایک ایسے وقت میں کیا گیا جب سوشل ٹائم لائنز پر ان کے گانوں کی ویڈیوز پر تبصرہ کرنے والے یہ موازنہ کرتے بھی دکھائی دیے کہ مریم نواز، حمزہ شہباز اور جنید صفدر میں سے زیادہ سریلا کون ہے؟

چند ہفتے قبل لندن میں جنید صفدر اور عائشہ سیف کے نکاح کے بعد ایک تقریب کے موقع پر انہوں نے محمد رفیع کا گانا گایا تو بہت سے افراد مریم نواز اور کیپٹن صفدر کے صاحبزادے کو گلوکاری پر سراہتے رہے تھے۔

پیپلزپارٹی کی رہنما شرمیلا فاروقی نے جنید صفدر کے گانے کی ویڈیو شیئر کرتے ہوئے تبصرہ کیا تھا کہ ’جب آپ اپنے نکاح پر خود ہی سٹار ہوں۔‘

اسی دوران کچھ ٹویپس نے جنید صفدر کی ایک اور ویڈیو شیئر کی جس میں وہ معروف صوفی شاعر بابا بھلے شاہ کا کلام پڑھتے دیکھے اور سنے جا سکتے ہیں۔

جنید صفدر، حمزہ شہباز اور مریم نواز کی گلوکاری سے متعلق الگ الگ ویڈیوز پر تبصرہ کرنے والے ہر ایک کے گنگناہٹ کو اپنے اپنے انداز میں سراہتے رہے تاہم گفتگو کرنے والوں کی زیادہ تعداد گلوکاری کے معاملے میں جنید صفدر کو والدہ اور ماموں سے زیادہ بہتر قرار دیتے رہے۔

مسلم لیگ ن کی نائب صدر مریم نواز کے متعلق پارٹی کی ترجمان مریم اورنگزیب کی جانب سے یہ اعلان کیا گیا تھا کہ وہ بیٹے کی شادی کی تقریبات کے سلسلے میں 15 روز کے لیے سیاسی سرگرمیوں سے دور رہیں گی۔