ایجپٹ ائیر کا جنوبی افریقہ کے لیے پروازیں بحال کرنے کا اعلان

مصر کی ایجپٹ ائیر لائنز نے اعلان کیا ہے کہ جنوبی افریقہ کے لیے 16 دسمبر سے پروازیں دوبارہ  بحال کر دی جائیں گی۔

عرب نیوز کے مطابق مصر کی ائیرلائنز کی جانب سے کہا گیا ہے کہ قاہرہ اور جوہانسبرگ کے درمیان ہر جمعرات کو ایک پرواز   روانہ ہو گی۔

مصر کی وزارت صحت کی جانب سے اعلان  کیا گیا ہے کہ  کورونا وائرس کی نئی قسم کے پھیلاو کو روکنے کے لیے جنوبی افریقہ سے آنے والے  تمام مسافروں پرحفاظتی اقدامات کا اطلاق   کیا جائے گا۔

واضح رہے کہ مصر نے  نئے کورونا وائرس او می کرون کی مختلف قسم کے خدشات کے پیش نظر 26 نومبر کو  جنوبی افریقہ کے لیے روانگی  اور وہاں سے براہ راست پروازیں  آنے پر پابندی  لگانے کا فیصلہ کیاتھا۔

وزارت  صحت کے ترجمان حسام عبدالغفار نے بتایا ہے کہ کورونا وائرس کی نئی قسم اومی کرون ابھی تک مصر نہیں پہنچی اور اس وائرس سے نمٹنے کے لیے وزارت صحت  کی جانب سے اقدامات کیے جا رہے ہیں۔

دریں اثنا ورلڈ ہیلتھ آرگنائزیشن کی جانب سے بتایا گیا ہے کہ دنیا بھرکے 57 ممالک میں کورونا وائرس کی نئی قسم او می کرون کے بارے میں انکشاف ہوا  ہے۔