انڈین کھلاڑیوں کی بسمہ معروف کی بیٹی کے ساتھ ویڈیو اور سیلفیاں

انڈیا نے ویمنز ورلڈکپ کے میچ میں پاکستان کو 107 رنز سے شکست دے کر اپنے میگا ایونٹ کی شروعات جیت کے ساتھ کی ہے۔

نیوزی لینڈ کے شہر ماؤنٹ ماؤنگنائی میں انڈیا اور پاکستان کے درمیان میچ سے پہلے اور بعد میں دونوں ممالک کی خواتین کھلاڑیوں سے زیادہ سوشل میڈیا پر صارفین پاکستان کی کپتان بسمہ معروف کی شیرخوار بیٹی فاطمہ اور انڈین کھلاڑیوں کے محبت بھرے لمحات پر گفتگو کرتے نظر آئے۔

دونوں ٹیموں کے درمیان میچ کے بعد ایک ویڈیو میں دیکھا جاسکتا ہے کہ بسمہ معروف اپنی بیٹی کو کندھے سے لگائے کھڑی ہیں اور انڈین خواتین کھلاڑی ان کے ارد گرد جمگھٹا لگائے کھڑی ہیں اور فاطمہ سے بات چیت کرنے کی کوشش کررہی ہیں۔

صرف یہی نہیں انڈین کھلاڑیوں نے بسمہ معروف اور فاطمہ کے ساتھ ہنستے مسکراتے سیلفیاں بھی لیں۔

سوشل میڈیا صارفین نے بسمہ معروف کی بیٹی اور انڈین کھلاڑیوں کے درمیان بات چیت کی کوشش کو اس میچ کا سب سے بہترین لمحہ قرار دیا۔

زوہیب خان نامی صارف نے ایک تصویر پوسٹ کی جس میں انڈین کھلاڑی ایکتا بھشت کو فاطمہ سے بات کرنے کی کوشش کرتے ہوئے دیکھا جاسکتا ہے۔

صرف یہی نہیں پاکستان کی کپتان بسمہ معروف جب اتوار کے روز میچ کھیلنے کے لیے گراؤنڈ آئیں تو اس وقت بھی لال رنگ کے کپڑوں میں ملبوس ان کی کمسن بیٹی ان کی گودھ میں تھیں۔

واضح رہے بسمہ معروف کی بیٹی فاطمہ کی پیدائش پچھلے سال اگست میں ہوئی تھی اور ان کی عمر سات ماہ ہے۔

بسمہ معروف نے ان کی پیدائش کی وجہ سے دسمبر 2020 میں چھٹیاں لیں تھیں اور ان کی ٹیم میں دوبارہ واپسی تقریباً ایک سال بعد دسمبر 2021 میں ہوئی تھی۔