وزیراعظم عمران خان کی کال پر مختلف شہروں میں کارکنوں کا احتجاج

پاکستان کے وزیراعظم عمران خان کے خلاف تحریک عدم اعتماد پر ووٹنگ سے ایک روز قبل اسلام آباد، پشاور اور کراچی سمیت مختلف شہروں میں تحریک انصاف کے کارکنوں نے احتجاجی مظاہرے شروع کر دیے ہیں۔ 

وزیراعظم عمران خان نے سنیچر کی شام کو سرکاری ٹی وی پر عوام کے سوالات کا جواب دیتے ہوئے نوجوانوں کو تحریک عدم اعتماد کے خلاف احتجاج کی کال دی۔

وزیراعظم کا کہنا تھا کہ ’یہ آپ کے مستقبل کی جنگ ہے، اپنے ملک کے لیے آپ کو لڑنا ہوگا۔ اگر آپ چُپ کر کے بیٹھیں گے تو برائی کا ساتھ دیں گے۔‘ 

’نوجوانوں کو بیرونی سازش کے خلاف پرامن احتجاج کرنا چاہیے، قوم کے نوجوانوں کو قوم کی غیرت کے لیے کھڑا ہونا ہے۔ احتجاج کرنا آپ کا حق ہے۔‘

وزیراعظم کے اس بیان کے بعد اسلام آباد میں نیشنل پریس کلب کے سامنے تحریک انصاف کے کارکن جمع ہوئے اور اپنا احتجاج ریکارڈ کروایا۔

احتجاجی مظاہرے سے وفاقی وزیر منصوبہ بندی اسد عمر اور دیگر نے خطاب کیا اور تحریک عدم اعتماد کو غیر ملکی سازش قرار دیا۔ 

مظاہرین نے وزیراعظم عمران خان کے حق اور اپوزیشن اور امریکہ کے خلاف پلے کارڈز اٹھا رکھے تھے۔ 

اس سلسلے میں اب تک کا سب سے بڑا مظاہرہ  پشاور پریس کلب کے سامنے ہوا جس میں پاکستان تحریک انصاف کے کارکنوں کی بڑی تعداد نے شرکت کی۔ 

اس حوالے سے وفاقی وزیر اطلاعات فواد چوہدری نے ٹویٹ میں کہا کہ ’مہذب قوم کا احتجاج مہذب ہوگا اور تمام عمل آئین کے مطابق ہوگا۔ تشدد کی کوئی گنجائش نہیں ہے۔‘

وزیراعظم کے بیان کے بعد کراچی میں بھی احتجاج کی کل دے دی گئی ہے اور تحریک انصاف کراچی کی قیادت کی جانب سے چار مینار چورنگی پر دھرنے کا پروگرام بنایا گیا ہے۔ 

پی ٹی آئی رہنماؤں کی جانب سے کارکنوں کو چار مینار چورنگی پہنچنے کی ہدایت کی گئی ہے۔ 

پنجاب میں اس سلسلے میں تاحال کوئی بڑا احتجاج سامنے نہیں آیا، تاہم یہ اطلاعات ملی ہیں کہ سیالکوٹ کینٹ میں مقامی تنظیم نے مختصر احتجاجی مظاہرہ کیا ہے۔ 

وزیراعظم کی کال کے بعد نہ صرف اسلام آباد بلکہ ملک کے دیگر شہروں میں انتظامیہ الرٹ ہوگئی ہے۔ اسلام آباد انتظامیہ نے ریڈ زون کو کنٹینرز لگا کر سیل کر دیا ہے جبکہ شہر کی شاہراہوں پر ٹریفک میں خلل ڈالنے والوں کے ساتھ سختی سے نمٹنے کا فیصلہ کیا گیا ہے۔

اسلام آباد میں دفعہ 144 نافذ، ریڈ زون میں جلسوں پر پابندی

وفاقی دارالحکومت اسلام آباد کی انتظامیہ نے ریڈ زون میں جلسے جلوس اور ریلیوں پر پابندی عائد کردی ہے۔

سنیچر کی رات کو جاری ہونے والے نوٹی فیکیشن کے مطابق اسلام آباد میں دفعہ 144 نافذ کردی گئی ہے، خلاف ورزی کرنے پر کارروائی کی جائے گی۔ 

نوٹی فیکیشن میں مزید کہا گیا ہے کہ یہ فیصلہ امن وامان کی صورت حال خراب ہونے کے خدشے کے پیش نظر کیا گیا ہے۔ 

اس کے علاوہ اسلام آباد میں دو روز کے لیے ڈبل سواری پر بھی پابندی عائد کردی گئی ہے۔

نوٹی فیکیشن کے مطابق ’ان پابندیوں کا اطلاق سنیچر اور اتوار کی رات 12 بجے سے ہوگا۔‘

علاوہ ازیں میٹرو بس سروس بھی بند کرنے کا نوٹی فکیشن جاری کردیا گیا ہے۔